‘கோஸ் ப்ளே’வில் முதலிடம் வகிக்கும் ஜப்பானியர்

நாம் நமக்குப் பிடித்த ஸ்டைலில் உடையணிவது ஒருபக்கம் இருந்தாலும்கூட ரசிகர்கள் ரஜினி, கமல், விஜய், அஜீத் போல் உடை உடுத்துவதும், தொண்டர்கள் தலைவர்கள் போல் உடை உடுத்துவதும், பெண்கள் அசின், தமன்னா போல் உடையணிவதும் ஒரு வித ஸ்டைல்தான்.

ஒருசிலர் ரொம்ப வித்தியாசமாக பிரபல சினிமா, தொலைக்காட்சி கதாபாத்திரங்கள் போல, புகழ்பெற்ற பொம்மைகள் அணிந்து வரும் ஆடைகள் (உதாரணம் - பார்பி) போலவெல்லாம் உடை அணிவார்கள். அந்த கேரக்டர்கள் செய்வதையெல்லாம் கூட செய்து பார்ப்பார்கள். உலகம் முழுக்க பரவியிருக்கும் இந்த பழக்கத்திற்கு ‘கோஸ் ப்ளே’ (cosplay) என பெயர் வைத்திருக்கிறார்கள். காஷ்ட்டியூம் ரோல்ப்ளே (Costume Roleplay) என்பதின் சுருக்கம் தான் கோஸ் ப்ளே.

இந்த கோஸ் ப்ளே ஸ்டைலில் தன்னை மாற்றிக்கொள்வதில் ஜப்பானியர்கள்தான் முதலிடம் வகிக்கிறார்கள். தாங்களாக ஒன்றை தேர்ந்தெடுத்து அணிபவர்களைக் காட்டிலும், இது மாதிரி கோஸ் ப்ளே செய்பவர்கள் எண்ணிக்கை அங்கே பெருகி வருகிறதாம்.

ஜப்பானில் உலவும் கற்பனை பாத்திரங்களான மாங்கா, அனிமே, டோகுசட்சு, மற்றும் காமிக் புத்தகங்கள், புதினங்கள், விடியோ விளையாட்டுகள், பேண்டஸி திரைப்படங்கள் இவற்றில் எல்லாம் வரும் கற்பனை பாத்திரங்களைப் போல இவர்கள் உடை அணிகிறார்கள். இது என்னென்ன கலாசார விளைவுகளை ஏற்படுத்துமோ என்று பதைபதைக்கிறார்கள் ஜப்பானிய பெரிசுகள்.