நாயுமானது

மண் நிறம் தான்,
ஆங்காங்கே
காயம்பட்டு காய்ந்தும்
காயாததுமான தழும்புகள்,
சொறி நாய் என்று
சொன்னார்கள் ...

போகும், வரும்
எவரையும் கடிக்காமல்,
கண்டும் குரைக்காமல்
கூடுதலாய்
எங்கேனும் ஒரு மூலையில்
படுத்துக் கிடக்கும்
சிலவேளை நகர்ந்து
குப்பைகளிலும்
கால்வாய்களிலும்
பசியாறித் திரும்பும்

கல்லெறிந்து விரட்டியோரும்
தடியால் அடித்து
துன்புறுத்தியோரும்
ஓர் நாள் இரவில்
திருட வந்தவனை
விரட்டிக் கடித்ததால்
அந்த நாயைப் புகழ்ந்தனர்.

எங்கள் தெரு நாய்
என்ற
பட்டமளித்துப் பார்த்தனர்
அதன் பின்னர்
அந்தப்பக்கம் திருடர்கள்
திரும்பிப்பார்க்கவே இல்லை.

ஒரு நாள் அதிகாலை
அந்த நாய்
சுடப்பட்டுக் கிடந்தது
மனிதர்களைப் போல!

தேர்தல் காலமென்பதால்
வாக்குக்கேட்டு
வந்த மந்திரியை துரத்திக்
கடித்து விட்டதாக
கண்டவர்கள் சொன்னார்கள் .

நாய்க்கு தெரிந்தது
இந்த மனிதர்களுக்கு....?

இப்னு அஸூமத்