விமான பயணங்களுக்கு எமனாக விளங்கும் ஐஸ்லாந்து எரிமலை

ஐஸ்லாந்தில் ஒரு எரிமலை வெடித்துக் குமிறியிருப்பது, உலகின் கவனத்தைக் கவர்ந்துள்ளது. அது கடந்த சில தினங்களாக குமிறிக் குமுறி வெளிவிட்டு வரும் புகையும் தூசியும் தொன் கணக்கில் வானில் பரவிவருவதால் ஐரோப்பிய பிராந்தியத்தில் பரவலாக தூசு மேகங்களை ஏற்படுத்தி, சர்வதேச விமான சேவையை பாதித்திருக்கிறது.

வான் வெளி போக்குவரத்தை பாதிக்கும் அளவுக்கு ஒரு எரிமலை குமுறியிருப்பது, பெரும்பாலும், இதுவே முதல் தடவையாக இருக்கும்.

ஐஸ்லாந்தை உலக வரைபடத்தில் தேடுவது கஷ்டம். இந் நாட்டைப்பற்றிய தகவல்களும் பலருக்கும் தெரியாது. இதற்குக் காரணம் ஒன்றே ஒன்றுதான்.

துருவத்துக்கு சமீபமாக மிகக் குளிர் மிகுந்த ஒரு தீவாகஇது அமைந்திருப்பதும் இங்கே பயங்கரவாதம், பிரிவினைக்கோஷம், இராணுவப் புரட்சி, இயற்கை அனர்த்தங்கள், கொள்ளை அல்லது கொள்ளை நோய் என்பன மைனஸ் என்பதால்- அமளி துமளி இல்லாத நாடாக விளங்குவதால்- ஐஸ்லாந்து என்ற பெயர் ஊடகங்களில் இடம் பெறுவதில்லை. இப்படி ஒரு நாடு இருப்பது கூடப் பலருக்குத் தெரியாது.

39,769 சதுர மீட்டர் பரப்பளவும் அமெரிக்காவின் வர்ஜீனியா மாநிலத்தின் அளவும் கொண்ட இந்நாட்டின், 1989ம் ஆண்டு கணிப்பின் பிரகாரம், சனத்தொகை இரண்டரை இலட்சம் பேர்.

நாட்டின் முக்கால் வாசிப்பாகம் மனித நடமாட்டத்துக்கு உதவாத பனிப் பகுதிகள், மற்றும் பனி மலையகள், ஏரிகள், பெரும் பனிப் பெரிவெளிகள் என்பனவற்றை உள்ளடக்கியது. ரேஜாவிக்கை தலைநகராகக் கொண்ட ஐஸ்லாந்து, எரிமலைகளால் உருவான நாடு என்றும் சொல்வார்கள்.

மீன்பிடித்தொழில் தான் பிரதான பொருளாதாரம். எண்பது சதவீதமான கடலுணவுகள் ஏற்றுமதியாகின்றன. வருடாந்தம் 20 இலட்சம் மெட்றிக் தொன் மீள் பிடிக்கப்படுகிறது. தவிர, உருளைக் கிழங்கு மற்றும் ஏனைய கிழங்கு வகைகள், செம்மறியாடுகள் என்பன ஏனைய உற்பத்திப் பொருட்கள் வெளியே கையேந்தாத நாடு இது.

இங்கு வாழும் மக்கள் பெரும்பாலும் நோர்வேகாரர்களின் வழித்தோன்றல்கள். ஐஸ்லாண்டிக் என்ற மொழியைப் பேசுபவர்கள். தான் உண்டு தன் வேலையுண்டு என வாழ்ந்து வரும் இந்நாடு, இப்போது தான் உலகம் பேசும் பொருளாகி இருக்கிறது. இதற்குக் காரணம் ஒரு எரிமலை.

சுமார் 200 ஆண்டுகளாக எரிமலைத் தொல்லையில்லாதிருந்த ஐஸ்லாந்தில் கடந்த மார்ச் 20ம்திகதி கடலுக்கு அடியில் ஒரு எரிமலை குமுறி வெடித்தது.

கடல் ஆழத்தில், 650 அடி ஆழத்தில் இந்த எரிமலை குமுறி எரிக்குழம்பைக் கக்கியது கண்கொள்ளாக் காட்சி என அந்நாட்டு புவியியல் நிபுணர்கள் வர்ணித்தார்கள். கடலுக்கு அடியில் சென்று நேரில் பார்த்து புகைப்படங்களையும் எடுத்தார்கள். மனிதர்கள் பார்த்திருக்க கடலடியில் எரிமலை ஒன்று வெடித்தது இதுதான் முதல் தடவையாகும்.

ஐஸ்லாந்து ஒரு கடலடி எரிமலைத் தொடரிலேயே அமைந்துள்ளது. இது அட்லாண்டிக் கண்டத்தகட்டின் மீது அமைந்திருப்பதால் இதன் அசைவுகளின் போது இத்தொடரில் ஏற்படும் இடைவெளிகளை எரிமலைக் குழம்புகள் இட்டு நிரப்புமாம். இச் சமயத்தில் ஐஸ்லாந்தில் எரிமலை பிரச்சினை எழும்.

கடந்த மாதம் பொங்கிய கடலடி எரிமலை ஐஸ்லாந்து மேற்பரப்பில் பெரிய சேதங்கள் எதுவும் ஏற்படுத்தாமல் ஓய்ந்துவிட்டது. ஆனால் கடந்த திங்கட்கிழமை இந்த எரிமலை மீண்டும் வேகம் பெற்று குமுற ஆரம்பித்ததோடுதான் பிரச்சினை கிளம்பியிருக்கிறது.

எரிமலைகளை இரண்டு வகையாகப் பிரிக்கலாம். ஒன்று வெடித்துக் கிளம்பி முழு வீச்சில் நெருப்புக் குழம்புகளை வாரி இறைத்து பெருத்த சேதத்தை ஏற்படுத்தும் ரகம். இரண்டாவது, முழு வீச்சில் பொங்கி வழியாமல் புகையையும் சாம்பலையும் தொடர்ந்து கக்கிக் கொண்டிருப்பது.

இவ்வகை எரிமலைகளை, இயங்கிக் கொண்டிருக்கும் எரிமலை என அழைப்பார்கள். சில சமயம் புகை கக்குவதை நிறுத்தி விட்டு அமைதியாகிவிடும். சில சமயம் இவை குமுறலின் இறுதியில் முழுமையாக வெடிக்கவும் கூடும்.

ஐஸ்லாந்து எரிமலை புகையையும், சாம்பலையும், கற்களையும் 11 கி. மீ. உயரத்துக்கு வீசி எறிந்து வருகிறது. இது வானில் எறிந்து வரும் சாம்பல் மண்டலத்தில் சிறுகற்கள் மற்றும் கண்ணாடித் துண்டுகள் பில்லியன் கணக்கில் காணப்படுகின்றன.

கடும் புகையை அடர்த்தியாகக் கக்கிவரும் இந்த எரிமலையில் இருந்து வெளியேறிவரும் இத்தூசு மண்டலம் விண்ணில் விரிந்து பரவி வருவதால் விமானப் பயணங்களைப் பல ஐரோப்பிய நாடுகள் இடைநிறுத்தியுள்ளன.

ஐரோப்பாவில் தினமும் 28 ஆயிரம் விமான சேவைகள் நடைபெறுகின்றனவாம். கடந்த வெள்ளிக்கிழமை 11 ஆயிரம் விமான சேவைகளே நடைபெற்றனவாம். ஐரோப்பாவில் இப்படியென்றால், ஐரோப்பாவுக்கான வெளிநாடுகளின் விமான சேவைகளும் தற்போது நிறுத்தப்பட்டுள்ளன.

இந்தியா கடந்த வியாழக்கிழமை ஐரோப்பிய நாடுகளுக்கான தனது சகல சேவைகளையும் இடைநிறுத்தி வைத்தது. கடந்த வெள்ளிக்கிழமை கட்டுநாயக்காவில் இருந்து ஐரோப்பிய நாடுகளுக்கு புறப்படவிருந்த மூன்று விமானங்களின் பயணங்கள் நிறுத்தி வைக்கப்பட்டன.

இது தவிர, லண்டன் ஹீத்ரோ, கெட்விக் விமான நிலையங்கள் கடந்த வியாழன் இழுந்து மூடப்பட்டன. அன்று சேவையில் ஈடுபடுத்தப்படவிருந்த ஆயிரத்து 250 விமான சேவைகளில் 840 சேவைகள் நிறுத்தி வைக்கப்பட்டன. இதனால் ஒரு இலட்சத்து 80 ஆயிரம் பயணிகள் திண்டாடிப் போயினர். கெட்விக் விமான நிலையத்தில் மேலும் ஆயிரத்து 200 பேர் மாட்டிக் கொண்டனர்.

நோர்வே, சுவீடன், பெல்ஜியம், பிரித்தானியா, பிரான்ஸ், பின்லாந்து, டென்மார்க், ஜெர்மனி ஆகிய நாடுகளின் விமான நிலையங்களும் மூடப்பட்டுள்ளதோடு அந்நாடுகளின் விமான சேவைகளும் மட்டுப்படுத்தப்பட்டுள்ளன.

ஐரோப்பாவின் வடமேற்கு திசை பருவக் காற்று இத்தூசி மண்டலத்தை மேலும் தெற்கு ஐரோப்பாவுக்கு நகர்த்தலாம் எனவும் அச்சம் தெரிவிக்கப்பட்டுள்ளது. இது அமெரிக்காவையும் ஐரோப்பாவையும் பிரிக்கும் அட்லாண்டிக் சமுத்திரத்தின் மீது குவியும் என்றும் எதிர்பார்க்கப்படுகிறது.

இவ்வாறு நடக்குமானால் ஐரோப்பாவில் இருந்து அமெரிக்கா கிளம்பும் சகல விமான சேவைகளும் துண்டிக்கப்பட்டு இரு பெரும் கண்டங்களுக்கு இடையிலான போக்குவரத்து முற்றாகத் துண்டிக்கப்படக் கூடிய ஆபத்தும் உண்டு.

எரிமலை குமுறலுக்கும் விமான பயணங்களுக்கும் இடையே என்ன சம்பந்தம் என்கிaர்களா?

பாதுகாப்பான விமான பயணத்துக்குத் தெளிவான பார்வை அவசியம். என்னதான் கணனியும் கெஜட்டுகளும் இருந்த போதிலும் எதிரே என்ன இருக்கிறது என்பதை விமானிகள் தெளிவாகப் பார்க்கக் கூடியதாக இருக்க வேண்டும். கடும் மழை, மேக மூட்டம், பனிப்பொழிவு ஆகியவை மிகுந்திருக்கும் போது விமானிகள் தமது விமானங்களை தரை இறக்குவதில்லை.

ஒரு தடவை போகிப் பண்டிகை கொண்டாடுகிறேன் என்று சென்னை வாழ் தமிழர்கள் டயர்களையும் ஏனைய பழைய பொருட்களையும் போட்டு எரிக்க, அதில் இருந்து கிளம்பிய கரும்புகை சென்னை வானை கருமையாக்கவே, மீனம்பாக்கம் விமான நிலையத்தில் இறக்கவென வந்த விமானங்களை வேறு மாநில விமான நிலையங்களுக்குத் திருப்பி விட நேர்ந்ததை இங்கே உதாரணமாகக் குறிப்பிடலாம்.

பனி மூட்டம் சூழ்ந்திருந்ததால்தான் மொஸ்கோ விமான நிலையத்தில் இறங்க வேண்டிய விமானத்தை ஓடுபாதைக்கு முன்னராகவே காட்டின் மீது விமானி விமானத்தை இறக்கவே, அதில் பயணம் செய்த போலந்து அதிபரும் அவரது பாரியார் மற்றும் இராணுவத் தளபதி ஆகியோர் அகால மரணமடைந்த செய்தியை இம் மாதத்தின் முற்பகுதியில் நாம் கேள்விப்பட்டோம்.

ஐஸ்லாந்து கிளப்பிவிட்டிருக்கும் புகை, தூசு மண்டலம் காட்சித் தெளிவின்மையை உருவாக்கி விபத்துக்கு வழி வகுக்கலாம் என்று விமான சேவை நிறுவனங்கள் கருதுகின்றன. மேலும் விமானங்களில் உள்ள ரேடார் கருவி, ஈரலிப்பான பொருட்களை அடையாளம் காட்டக் கூடியவை. தூசு மண்டலத்தை அது அடையாளம் காட்டாது என்பது இன்னொரு ஆபத்தான விஷயம்.

காற்றில் பரவியிருக்கும் தூசு, கற்கள், கண்ணாடித் துண்டுகள் சுழலும் விமான விசிறிகளுக்குள்ளும் என்ஜின்களுக்குள்ளும் சுலபமாக புகுந்து என்ஜின்களை இயங்காமல் செய்து விடமுடியும்.

1982ம் ஆண்டு பிரிட்டிஷ் ஏயர்வேஸ் போயிங் பயணிகள் விமானமொன்று இந்தோனேஷியாவுக்கு அருகே பறந்து கொண்டிருந்த போது ஜாவாவில் புகையும் சாம்பலுமாகக் கக்கிக் கொண்டிருந்த எரிமலை கிளப்பிய தூசு மண்டலத்தில் அது சிக்கியது. அந்த எரிமலை புகை கக்கிய 19 தினங்களின் பின்னரேயே இச்சம்பவம் நிகழ்ந்தது என்பது இங்கே குறிப்பிடத்தக்கது.

எரிமலை சாம்பலும் சிறு கற்களும் என்ஜினுக்குள் புகுந்ததால் விமானம் நிலை குலைந்து திடீரென 24 ஆயிரம் அடிகீழே விழுந்து, விமானிகளின் திறமையால் பின்னர் மேலே ஏறியதாம். பெரும் விபத்தொன்று அன்று தவிர்க்கப்பட்டிருந்தது.

இச்சாம்பல் என்ஜின்களை இயங்காமல் செய்துவிட முடியும் என்பதோடு கெபின் எனப்படும் பயணிகள் இருக்கைக் கூடத்துக்குள் நுழைந்து, பயணிகளை செளகரியமாக வைத்திருக்க உதவும் நுணுக்கமான இலத்திரன் உபகரணங்களையும் செயலிழக்கச் செய்துவிட முடியும் எனவும் விமானத்துறை பொறியியலாளர்கள் கருதுகிறார்கள்.

எனவே எல்லா வகையிலும், எரிமலைச் சாம்பல் பரவியிருக்கும் விண் பிராந்தியத்தின் ஊடாக விமானங்களைப் பறக்கவிடுவது அபாயகரமானது என்பதாலேயே ஐரோப்பிய விமான நிலையங்கள் மூடப்பட்டு ஆயிரக்கணக்கான விமான பயணங்கள் நிறுத்தி வைக்கப்பட்டுள்ளன.

ஒரு எரிமலை எப்போது குழுறும் என்று எப்படி உறுதியாகச் சொல்ல முடியாதோ அவ்வாறே எப்போது அடங்கும் என்பதனையும் ஆரூடமாகச் சொல்ல இயலாது. கடந்த வெள்ளிக்கிழமை ஒரு பிரிட்டிஷ் பூகர்ப்பவியல் விஞ்ஞானி, இந்த எரிமையின் சீற்றம் தணிந்துவிடும் என்றும் இனிமேல் புகையும் சாம்பலும் கக்கும் அளவுக்கு அதனிடம் திண்மப் பொருட்கள் இருப்பதற்கான வாய்ப்பில்லை என்றும் கருத்து தெரிவித்துள்ளார்.

ஆனால் வேறு சில விஞ்ஞானிகளோ, ஒரு தடவை ஓய்ந்து விட்டு மீண்டும் சாம்பலைக் கக்கத் தொடங்கியதால் தற்போது இதன் இயக்கம் தணிந்தாலும் எப்போது வேண்டுமானாலும் மீண்டும் சாம்பலையும் கற்களையும் விண்ணில் கக்கலாம் என்றும் அடுத்த ஒரு வருட காலத்துக்கு இப்படி நடந்தால் அது உலக விமான சேவைத்துறைக்கு மரண அடியாக அமைந்துவிடும் என்றும் அச்சம் தெரிவித்துள்ளனர்.

இச் சாம்பல் மனிதனின் தேக ஆரோக்கியத்தில் பாதிப்பை ஏற்படுத்துவதில்லை. ஆனால் விமானங்களுக்கு நம்பர்வன் எதிரி. அடுத்த ஒரு வருட காலத்தில் சில தடவைகள் விமான பயணங்களில் பாதிப்பை ஏற்படுத்துமானால் அமெரிக்காவிலும் ஐரோப்பாவிலும் பொருளாதாரப் பிரச்சினைகளைத் தோற்றுவிக்கும்.

உலக விமான சேவை நிறுவனங்கள், உலக பொருளாதார நெருக்கடி ஏற்படுத்திய கடுமையான பாதிப்பில் இருந்து இப்போதுதான் விடுபட ஆரம்பித்துள்ளன. இச்சமயத்தில்,

‘இறைவா நமக்கு இப்படி ஒரு சோதனையா?’ என உலக விமான சேவை நிறுவனங்கள் அங்கலாய்த்துக் கொண்டிருக்கின்றன.

எனவே ஞாயிற்றுக்கிழமை நிலைமைகள் சீராகிவிடும் என்ற எதிர்பார்ப்பு நனவாகட்டும்.

சத்யா