இலங்கையில் அதிகரித்து வரும் போதைப் பொருள் பாவனை _

இலங்கையில் போதை பொருள் பாவனை வீதம் அதிகரித்து வருவதாக தேசிய போதை பொருள் தடுப்பு சபை எச்சரிக்கை விடுத்துள்ளது. கூடுதலாக இளைஞர்களிடையே இப்பாவனை சடுதியாக அதிகரித்திருப்பதை அது சுட்டிக்காட்டியுள்ளது.

அண்மையில் எடுக்கப்பட்ட ஆய்வொன்றின் பிரகாரம் இலங்கையில் 40 ஆயிரத்திற்கும் அதிகமானோர் போதை பொருளுக்கு நிரந்தர அடிமையாகியுள்ளமையும் 4 தொடக்கம் 6 லட்சத்திற்கும் இடைப்பட்ட தொகையினர் கஞ்சா பாவிப்பவர்கள் என்றும் தெரியவந்துள்ளது.

இலங்கையில் பொதுவாக ஹெரோயின், கஞ்சா, அபின், மர்ஜூவானா ஆகிய நான்கு போதை தரும் பொருட்களே பாவனையில் உள்ளன.

இலங்கைக்கு வருகை தரும் உல்லாசப்பயணிகள் மூலமே போதை பொருட்கள் கொண்டு வரப்படுகின்றன என்று ஆரம்ப காலகட்டங்களில் கருதப்பட்டாலும் தற்போது இலங்கையிலேயே இவற்றை வர்த்தகமாக செய்பவர்களின் எண்ணிக்கை அதிகரித்திருப்பதாக இலங்கை போதை பொருள் தடுப்புப் பொலிஸ் பிரிவினர் தெரிவிக்கின்றனர்.

இலங்கையில் 40ஆயிரத்திற்கும் மேற்பட்ட போதை பொருள் பாவனையாளர்களும் 6 லட்சம் வரையான கஞ்சா பாவனையாளர்களும் உள்ளனர் என மதிப்பிடப்படுகிறது.

* கஞ்சா : இலங்கையில் பரவலாக பாவனையில் உள்ள ஒரு போதை பொருள்.

* ஹெரோயின் : இலங்கையில் தடை செய்யப்பட்ட, மிக அபாயகர விளைவை ஏற்படுத்தும் போதை பொருள். எனினும் 1980 களுக்குப் பிறகு இலங்கையில் இதன் பாவனை அதிகரித்துள்ளது. மிக அதிக விலைக்கு விற்கப்படும் இந்தச் செந்நிறத் தூள், இலங்கையில் போதை பொருள் பாவனையில் இரண்டாவது இடத்தில் உள்ளது.

போதைக்கு அடிமையாவதற்கான பிரதான காரணிகள்

* பரீட்சை மற்றும் கல்வியில் தோல்வியடைதல்
* சமூக, குடும்பப் பிரச்சினைகள்
* வேலையின்மை, பாரிய குற்றச்செயல்களில் ஈடுபாடு, நோய்த் தாக்கம்

போதை பொருள் பாவிக்கும் வயது விகிதங்கள்

போதை பொருளுக்கு அடிமையாகி இருப்பவர்களில் பெரும்பான்மையானோர் 10 - 20 வயதுக்கிடைப்பட்ட காலங்களில் இப்பழக்கத்திற்கு அடிமையாகியுள்ளனர்.

போதை பொருள் எவ்வாறு அறிமுகமாகிறது?

* நண்பர்கள் 88.2%
* உல்லாசப்பயணிகள் 1.8%
* உறவினர்கள் 10.0%

வெளிநாட்டவரை விட நண்பர்கள் மூலமாகவே பலர் போதைப் பொருளுக்கு அடிமையாகின்றனர்.

இலங்கையில் 12 வீதமான போதை பொருள் பாவனையாளர்கள் ஊசி மூலம் போதையேற்றுபவர்கள் எனக் கண்டு பிடிக்கப்பட்டுள்ளது. அதிகப்படியாக 2005 ஆம் ஆண்டு 7761 பேர் போதை பொருள் பாவனை குற்றச்சாட்டில் கைது செய்யப்பட்டனர். இதில் 56 பேர் பெண்கள். போதைக்கு அடிமையானவர்களில் 50 வீதமானவர்கள் தமது முதல் போதை பொருளாக ஹெரோயினையே பாவித்துள்ளனர்.

போதைக்கு அடிமையாவோரின் கல்வித் தராதரங்கள்

க.பொ.த சா/த அல்லது அதற்கு மேல் 60%
பாடசாலைக்குச் செல்லாதோர் 02%
ஏனையோர் 38%

இலங்கையில் கூடுதலான மக்கள் தொகையினர் கிராமப் புறங்களிலேயே வாழ்ந்து வருகின்றனர். போதைக்கு அடிமையானவர்களில் 2/3 வீதத்தினர் நகர்ப்புறங்களைச்சேர்ந்தவர்கள். இதன் மூலம் கிராமப்புறங்களைவிட நகர்ப்புறங்களிலேயே அதிக போதை மருந்து பாவனை உள்ளமை தெரியவருகிறது.

நாளொன்றுக்குப் போதைப் பொருளுக்குச் செலவாகும் பணம் ரூபா 950 - 1000 வரை

229 பேருக்கு ஆயுள் தண்டனை : 74 பேருக்கு மரண தண்டனை

இலங்கையில் போதை பொருள் கடத்தல் மற்றும் பாவனையைக் கட்டுப்படுத்தும் நோக்கில் ஆரம்பிக்கப்பட்டதே போதைத் தடுப்புப் பணியகம். இந்தப் பணியகம் 1973 ஆம் ஆண்டு ஆரம்பிக்கப்பட்டது. கடந்த வாரம் தனது 37 ஆவது நிறைவு தினத்தை இப்பணியகம் கொண்டாடியது. அதன்போது இலங்கையில் போதை பொருள் பாவனை மற்றும் ஏனைய விடயங்கள் குறித்தும் கருத்துக்கள் முன்வைக்கப்பட்டன.

இப்பணியகத்தின் பணிப்பாளர் பிரதி பொலிஸ் மா அதிபர் சிசிர மெண்டிஸ் கருத்துத்தெரிவிக்கையில், இலங்கையில் இது வரை போதை மருந்து கடத்தல் மற்றும் அது தொடர்பான குற்றச்சாட்டுகளில் 229 பேருக்கு ஆயுள் தண்டனையும் 74 பேருக்கு மரண தண்டனையும் விதிக்கப்பட்டிருப்பதாகக் குறிப்பிட்டார்.

ஆயுள் தண்டனை விதிக்கப்பட்டவர்களில் 24 பேர் பெண்கள். மேலும் 67 பேர் வெளிநாட்டவர். மரண தண்டனை தீர்ப்பளிக்கப்பட்டவர்களில் 4 பெண்கள் உட்பட 13 பெர் வெளிநாட்டவராவர். அண்மையில் கல்பிட்டி பொலிஸாரால் 40 கிலோ கிராம் எடையுள்ள ஹெரோயின் போதை கைப்பற்றப்பட்டது. இதுவே இலங்கையில் அதிக ஹெரோயின் போதை மருந்து கைப்பற்றப்பட்ட முதல் சந்தர்ப்பமாகும்.

சிவலிங்கம் சிவகுமாரன்

(ஆதாரம்: இலங்கைப் போதைப் பொருள் தடுப்புப் பணியகம்)