மத்திய கிழக்கு நாடுகளில் வேலைவாய்ப்பு தேடிச்செல்வோர் தொடர்ந்தும் எதிர்நோக்கும் பிரச்சினை

குவைத்தில் வீட்டுப் பணிப்பெண்களாக தொழில் புரிந்து வந்த இலங்கையைச் சேர்ந்த 105 பேர் நாடு திரும்பவுள்ளதாக தகவல்கள் தவிக்கின்றன. அங்கு தொடர்ந்து தங்கியிருப்பதற்கான விசா காலம் நிறைவடைந்துள்ளமை, தொழில் வழங்குநர்களால் உரிய சம் ளம் வழங்கப்படாமை, பணிப் பெண்களாக பணிபுந்தோர் இம்சைக்குட்படுத்தப்பட்டமை போன்றவையே அவர்கள் நாடு திரும்ப காரணமாகும்.

மேற்படி பிரச்சினைகளுக்கு முகம்கொடுத்துள்ள பணிப் பெண்களை நாட்டுக்கு அழைத்துவரும் பொருட்டு, குவைத்திலுள்ள இலங்கைக்கான தூதரகம் தேவையான ஏற்பாடுகளை மேற்கொண்டிருப்பதாகத் தெரிவிக்கப்படுகின்றது.

இலங்கையிலிருந்தும் பெரும் எண்ணிக்கையான இளைஞர்கள் மற்றும் யுவதிகள் மத்திய கிழக்கு நாடுகளில் தொழில்புரிந்து வருகின்றனர். குறிப்பாக, நாட்டில் நிலவிய யுத்தம் காரணமாக ஏற்பட்ட அமைதியீனத்தால் வேலைவாய்ப்புக்கள் மற்றும் வருமானத்தைத்தேடும் மார்க்கங்கள் எதுவும் அற்ற நிலையில் நாட்டின் பல்வேறு குதிகளையும் சேர்ந்த இளைஞர்யுவதிகள் மத்திய கிழக்கு நாடுகளுக்கே படையெடுத்தனர்.

இவ்வாறு இளைஞர்யுவதிகளை அனுப்பிவைக்கும் பொருட்டு நாட்டின் மூலை முடுக்கெங்கும் பல்வேறு முகவர் நிலையங்கள் இயங்கிவருகின்றன. இந்த முகவர் நிலையங்கள் மத்திய கிழக்கு நாடுகளுக்கு இளைஞர்யுவதிகளை அனுப்பிவைக்கும் பொருட்டு அவர்களிடமிருந்து ஒரு தொகை பணத்தையும் பெற்றுவருகின்றன.

பணத்தைக் கட்டி எப்படியாவது வேலைவாய்ப்பு பெறவேண்டும் என்ற ஒரே நோக்கில் இளைஞர்யுவதிகள் கடன் பெற்றும், தங்கள் வசமுள்ள பொருட்கள், பண்டங்கள், நகைகள் என்பவற்றை விற்பனை செய்தும் பணத்தைத் திரட்டி இந்த முகவர்களிடம் கட்டி வேலை வாய்ப்புக்காக மத்திய கிழக்கு நாடுகளுக்குச் செல்கின்றனர். பல்வேறு சந்தர்ப்பங்களில் இவ்வாறு வேலைவாய்ப்புப் பெற்றுச்செல்வோருக்கு உரிய வேலைகள் கிடைக்காமல் போவதுடன், குறித்த தொகை சம்பளம் வழங்கப்படாமல் போகின்றது. இதனால், வேலை வாய்ப்பு பெற்றுச்செல்லும் அநேகமானவர்கள் சொல்லொணா கஷ்டங்களுக்கும், நெருக்கடிகளுக்கும் முகம்கொடுக்க வேண்டிய நிலைக்குத் தள்ளப்படுகின்றனர்.

மேலும் சிலர் எஜமானர்களால் துன்புறுத்தப்படுவதுடன், மாதக்கணக்கில் சம்பளம் வழங்காது தவிக்கவிடப்படுகின்றனர். இது குறித்து அவர்கள் முறையிடுவதற்கோ அன்றேல் தங்கள் நிலைமையை விளக்கி வீட்டாரிடம் தொடர்பு கொள்வதற்கோ முடியாத நிலைமையிலேயே இருந்து வருவதும் குறிப் பிடத்தக்கதாகும். இதனால் பலர் மாதக் கணக்கில் தமது உறவினர்களுடன் தொடர்பை ஏற்படுத்த முடியாத பெரும் அவஸ்தைக்கு உள்ளாகி வருவதும் குறிப்பிடத்தக்கதாகும்.

இதேவேளை, இலங்கையிலுள்ள அவர்களின் உறவினர்களும் இது தொடர்பில் எவருடனும் தொடர்புகொண்டு தகவல்களை பெறடியாத நிலைமையிலேயே இருந்து வருகின்றனர். முகவர் நிலையங்களை அணுகினால் அவர்கள் தமக்கு தெரியாதென்று கையை விரிப்பதன் காரணமாக மிகுந்த கஷ்டங்களை அவர்களின் உறவினர்கள் எதிர் நோக்க வேண்டியுள்ளது.

மேலும், சட்டவிரோத முகவர்களும் இவ்வாறு மத்திய கிழக்கு நாடுகளுக்கு பணியாளர்களை அனுப்பிவைப்பதன் காரணமாக மத்திய கிழக்கு நாடுகளுக்கு வேலை வாய்ப்பு தேடிச் செல்வோர் இடை நடுவில் ஏமாற்றப் படுவதும் சர்வசாதாரணமாக தொடர்ந்துவருகின்றது. எப்படியாவது மத்திய கிழக்கு நாடொன்றுக்குச் சென்று வேலை வாய்ப்பு பெற்றுவிட வேண்டும் என்ற ஒரே குறிக்கோளுடன் இளைஞர் யுவதிகள் காணப்படுவதுடன் இவர்கள் இது குறித்து ஆராய்ந்து பார்ப்பதோ அன்றேல் எவறதும் ஆலோசனையைப் பெறுவதோ கிடையாது.

இந்நிலையிலேயே மத்திய கிழக்கு நாடுகளில் எஜமானர்களால் வஞ்சிக்கப்பட்டு, தண்டிக்கப்பட்டு நித்தம் நெருக்கடிகளுக்கு முகம் கொடுத்து வருகின்றனர். அது மாத்திரமன்றி மத்திய கிழக்கு நாடுகளுக்கு வேலைவாய்ப்பு பெற்றுச் செல்லும் யுவதிகள் பலர் மன அழுத்தங்கள் காரணமாக நோய்வாய்ப்பட்டுள்ளமையும் குறிப் பிடத்தக்கதாகும்.

இவ்வாறான நெருக்கடிகளை போக்கும் வகையில் இலங்கை வெளிநாட்டு வேலைவாய்ப்புப் பணியகம், வெளிநாடுகளுக்கு செல்வோர் பணியகத்தில் தங்களை பதிவு செய்ய வேண்டும் என்பது உட்பட பல்வேறு ஆலோசனைகளை வழங்கிவருகின்றது. எனினும், இவற்றை அவர்கள் முறையாக பின்பற்றுகிறார்களா என்பதும் கேள்விக்குறியாகவே இருந்து வருகின்றது.

எவ்வாறெனினும், மத்திய கிழக்கு நாடுகளில் பணிபுரியும் இலங் கையர்களின் பாதுகாப்பை உறுதிசெய்ய தேவையான நடவடிக்கைகள் அவசியமாகும். அதேவேளை, இலங்கையில் செயற்படும் சட்ட விரோத வேலைவாய்ப்பு முகவர் நிலையங்களின் நடவடிக்கைகள் குறித்து கண்காணிப்பது இன்றியமையாதது.

எந்தவகையிலும் தங்கள் குடும்பத்தை முன்னேற்ற வேண்டும் என்ற நோக்கத்தின் அடிப்படையிலேயே பல்வேறு தியாகங்களுக்கும் மத்தியில் மத்திய கிழக்கு நாடுகளுக்கு இளைஞர்யுவதிகள் வேலைவாய்ப்புத் தேடிச் செல்கின்றனர். எனினும், அங்கு அவர்கள் அநாவசியமாக தண்டிக்கப்படுவதும், ஏமாற்றப்படுவதும், சித்திரவ தைக்குட்படுத்தப்படுவதும் எந்த வகையிலும் குறைந்தபாடி யில்லை.

மேலும், இவ்வாறு வேலைவாயப்புத் தேடிச் சென்ற சிலர் அங்கிருந்தும் சடலமாக அனுப்பிவைக்கப்பட்ட துயரச் சம்பவங்களும் இருக்கவே செய்கின்றன. எனவே, மத்திய கிழக்கு நாடுகளுக்கு வேலைவாய்ப்பு பெற்றுச்செல்வோர் மிகுந்த எச்சரிக்கையுடன் நடந்துகொள்ளும் அதேவேளை, அங்கு அவர்களின் பாதுகாப்பை உறுதிசெய்யும் வகையில் மத்திய கிழக்கு நாடுகளிலுள்ள இலங்கைத் தூதரகங்கள் காத்திரமான நடவடிக்கைகளை எடுப்பது அவசியம் என்பதை வலியுறுத்திக் கூறவிரும்புகின்றோம்.