உலகத்தை உலுக்கும் விமான விபத்துகள்

எனினும் மனிதன் பயணம் செய்து கொண்டேதான் இருப்பான்!
கடும் மழை, அனல் பறக்கும் வெப்பம், கிடுகிடு குளிர் என இயற்கையின் சீற்றத்தால் இந்தியத் துணைக்கண்டத்தில் வருடந்தோறும் அநேகர் காவுகொள்ளப்பட, அடிக்கடி அங்கு இடம்பெறும் குண்டு வெடிப்புகளாலும் நூற்றுக்கணக்கானோர் உயிரிழக்கின்றனர்.

தற்போது விமானப் பயணங்களும் அங்கு ஆபத்தானவையாக மாறியிருக்கின்றன. கடந்த சனிக்கிழமையன்று துபாயில் இருந்து, கர்னாடகத்தின் மங்களூருக்கு வந்த எயர் இந்தியாவுக்குச் சொந்தமான போயிங் 737 வகையைச் சேர்ந்த பயணிகள் விமானம் விபத்துக்குள்ளானது.

துபாயிலிருந்து புறப்பட்டு சுமார் 4 மணிநேர பிரயாணத்தின் பின்னர், அதிகாலை சுமார் 6.30 அளவில் மங்களூர் விமான நிலையத்தை அதிகாரிகள் தரையிறங்க அனுமதித்திருக்கிறார்கள். போதிய வெளிச்சம் இன்மையால் கவனமாகத் தரையிறங்குமாறு அதிகாரிகள் கூறியிருக்கின்றார்கள்.

ஆனால் திடீரென விமானத்துக்கும் கட்டுப்பாட்டு அறைக்குமிடையிலான தொடர்பு துண்டிக்கப்பட, விமானம் திடீரெனத் தீப்பிடிக்க ஆரம்பித்தது. ஆனால் விமான நிலையத்திலிருந்து ஒரு கிலோ மீற்றருக்கும் குறைவான தூரத்தில் இருக்கும் போதுதான் இது நடந்தது.

விமான நிலைய சுற்றுப் பகுதிக்குள் விமானம் புகுந்து தரையிறங்க சில நொடிகள் இருக்கையில் நிலை தடுமாறி அதன் பாதை மாறியது. தீ பரவமுன் விமானத்தை இறக்கிவிட விமான நிலைய அதிகாரிகள் முயற்சித்த போதும், விமானம் கட்டுப்பாட்டை இழந்து புதிய ஓடுதளத்தில் இறங்குவதற்குப் பதிலாக அருகே தரையிறங்கி இழுத்துச் செல்லப்பட்டு மலையடிவாரத்தில் விழுந்து வெடித்துச் சிதறியது. விழுவதற்கு முன்னர் இரண்டாகப் பிளந்திருக்கிறது விமானம்.

உறவினர்களை வரவேற்கவென ஆவலோடு விமான நிலையத்துக்கு வந்தவர்கள், இக்கோர விபத்தைப் பார்த்துத் துடிதுடித்துப் போனார்கள். உடனடியாக தீயணைப்புப் படையினர் சம்பவ இடத்துக்கு வரவழைக்கப்பட்டனர்.

விமானம் மோதிய வேகத்தில் வெடித்துச் சிதறியதால், சம்பவ இடத்தில் பயணிகள் கருகிப் பலியானார்கள்.

163 பயணிகள், 4 குழந்தைகள், 6 விமான ஊழியர்கள் என மொத்தம் 173 பேர் பயணம் செய்த விமானத்தில் 160 பயணிகள் பலியாகியிருப்பதாக, கர்னாடக முதலமைச்சர் எடியூரப்பா அறிவித்திருந்தார்.

இவ்விமான விபத்தில் 6 பேர் அதிசயமாக உயிர் பிழைத்திருக்கிறார்கள். படுகாயங்களுடன் உயிருக்குப் போராடிய அவர்கள் மீட்புப் பணியினரால் மீட்கப்பட்டு மருத்துவமனையில் அனுமதிக்கப்பட்டிருக்கின்றனர். உயிருக்குப் போராடி ஒரு குழந்தையும் மீட்கப்பட்டிருக்கின்றது.

விபத்துக்கான காரணம் பற்றிய விசாரணைகள் இடம்பெற்றுவருகின்றன.

போதிய வெளிச்சமின்மையே விபத்துக்கான காரணமாக இருக்கலாம் என நம்பப்பட்ட போதும், விமானம் தரையிறங்கிக் கொண்டிருக்கையிலேயே அதன் ஒரு இறக்கை தீப்பிடித்ததைக் கண்டதாக, விபத்தை நேரில் பார்த்த ஒருவர் கூறியுள்ளார்.

ஆபத்துக் காலங்களில் தற்காத்துக்கொள்ளும் எல்லா நவீன வசதிகளும் போயிங் 737 ரக விமானங்களில் உண்டு. தரையிறங்க முயற்சிக்கும் போது நிலைமை சீரில்லைஎன்றால் கூட விமானத்தை உடனடியாக மேலே எழுப்ப முடியும். விமானியின் தவறான கணிப்பும் விபத்துக்கு ஒரு காரணமாக இருக்கலாம் என்று விசாரணைகளை மேற்கொள்ளும் அதிகாரிகள் கூறுகின்றனர்.

விமானத்தின் கறுப்புப்பெட்டியும் கண்டெடுக்கப்பட்டுள்ளது. விமானம் எவ்வளவு சேதமடைந்தாலும் கறுப்புப் பெட்டி சேதமேதும் அடையாது என்பது குறிப்பிடத்தக்கது.

விமான விபத்தில் பலியானோரின் குடும்பங்களுக்கு 7.6 மில்லியன் நஷ்டஈடு வழங்கப்படுமென்று இந்திய அரசு அறிவித்துள்ளது. இந்நஷ்டஈட்டுத் தொகையில், பிரதமர் மற்றும் கர்நாடக முதல்வர் ஆகியோரின் தலா 4 இலட்சம் ரூபாயும் அடங்கும்.

இதில் மிகவும் கவலைக்குரிய விடயம் என்னவெனில் ஒரே குடும்பத்தைச் சேர்ந்த 16 பேர் இவ்விபத்தில் உயிரிழந்திருப்பதுதான். சவூதி அரேபியாவில் பணிபுரியும் சமீர்ஷெய்க் என்பவர் தனது மனைவி,இரு குழந்தைகள் உள்ளிட்ட 16 பேரை இவ்விபத்தில் பலிகொடுத்துள்ளார். சமீரின் பாட்டியின் இறுதிச் சடங்கில் கலந்து கொள்வதற்காக இவர்கள் மங்களூர் வந்துள்ளனர். துரதிர்ஷ்டவசமாக அதுவே அவர்களது இறுதிப் பயணமும் ஆனது.

மங்களூர் விமான விபத்தில் உயிர் பிழைத்த 6 பேரும், விமானத்தின் பின்புறத்தில் அமர்ந்திருந்தவர்கள் என்பது குறிப்பிடத்தக்கது.

விமான விபத்துக்களின் போது, அதன் பிற்புறத்தில உள்ள ஆசனங்களில் அமர்ந்திருப்போர் உயிர் பிழைக்கும் சாத்தியக் கூறுகள் அதிகளவில் இருப்பதாக நிபுணர்கள் கூறுகின்றனர். விமான வித்துக்களின் போது அவ்வாறு பின்புற ஆசனங்களில் அமர்ந்திருப்போர் உயிர் பிழைப்பதற்கான சாத்தியக்கூறுகள் 40 சதவீதமாக இருப்பதாகவும் அவர்கள் கூறுகின்றனர். 1971ஆம் ஆண்டு முதல், அமெரிக்காவில் நடந்த விமான விபத்துக்களையும், விமானத்தின் ஒவ்வொரு பாகத்திலும் உயிர்பிழைத்தவர்களின் எண்ணிக்கையும் அலசி ஆராய்ந்ததன் விளைவாக, 11 விமான விபத்துக்களில் 07இல், பின் ஆசனங்களில் அமர்ந்தவர்கள் உயிர் பிழைத்துள்ளமை கண்டுபிடிக்கப்பட்டுள்ளது. 1972ஆம் ஆண்டில், வொஷிங்டனில் நடந்த எயர் புளோரிடா விமான விபத்தில், உயிரிழந்த அனைவரும் பின் இருக்கைகளில் அமர்ந்திருந்தவர்கள். அதேபோல, 1978 இல் போர்ட்லண்டில் எரிபொருள் தீர்ந்ததால் நடந்த விமான விபத்தில் உயிரிழந்த அனைவரும் முன்வரிசை ஆசனக்காரர்கள்.

உலகம் முழுவதும் கடற்த 13 ஆண்டுகளில் 400 விமான விபத்துக்கள் நடந்துள்ளன. அவற்றில் சுமார் 6,000 பேர் வரை பலியாகியிருக்கிறார்கள்.

இவற்றில் குறிப்பிடத்தக்கவை:-

* கடந்த மாதம் மேற்கு ரஷ்யாவில் நடந்த விமான விபத்தில், போலந்து நாட்டின் ஜனாதிபதி லேக் கசின்ஸ்கி உட்பட 93 பேர் உயிரிழந்தனர்.

* 10 நாட்களுக்கு முன் லிபியத் தலைநகரான திரிபோலியில் நடந்த விமான விபத்தில் 103 பேர்

* 2009 ஜூன் மாதம் பாரிஸ் நோக்கிச் சென்று கொண்டிருந்த விமானம் அத்திலாந்து கடலில் வீழ்ந்து 228 பேர் பலியானார்கள்.

* அதேயாண்டு அதேமாதம் கெமொரோஸ் தீவுகளுக்குரிய யெமன் நாட்டு விமானம் வீழ்ந்து நொறுங்கியதில் 153 பேர் பலியானார்கள்.

* அதேயாண்டில் ஜுலை மாதத்தில் ஸ்பெயினின் மட்ரிட் நகரில் இருந்து புறப்பட்ட விமானம் ஈரானில் நொறுக்கி விழுந்தது. 172 பேர் பலியானார்கள்.

* 2008 ஓகஸ்ட் மாதம் ஸ்பெயின் மாட்ரிட் விமான நிலையத்திலிருந்து புறப்பட்ட போது வீழ்ந்து நொறுங்கியது. இதில் 154 பேர் உயிரிழந்தார்கள்.

* அதே ஆண்டில் கஸகஸ்தானில் நடந்த 2 விமான விபத்துக்களில் 117 பேர் மரணமடைந்தனர்.

* பிறேசிலில் 2007 இல் நடந்த விமான விபத்தில் 119 பயணிகள் இறந்தனர்.

* உக்ரைனில் 2006 இல் நடந்த 3 விமான விபத்துக்களில் 450 பேர் பலியாகினர்.

* 2005 இல் கொலம்பியாவில் நடந்த விமான விபத்தில் 160 பேர் இறப்பு, அதே மாதத்தில் இந்தோனேஷியாவில் நடந்த விமான விபத்தில் 143 உயிரிழந்தனர்.

* 2005 பெப்ரவரியில் காபூலில் மலை மீது விமானம் மோதி விபத்துக்குள்ளானதில் 104 பேர் மரணித்தனர். அதே மாதத்தில், ஈரானின் இராணுவ வீரர்களை ஏற்றிச் சென்ற விமானம் விபத்துக்குள்ளாகியதில் 275 பேர் பலியானார்கள்.

* 2002 இல் அல்ஜிரிய விமான நிலையத்தில் இருந்து புறப்பட்ட விமானம், மேலே எழும்பிச்செல்ல முடியாமல் எரிந்து வீழ்ந்தது. இதில் 100 பேர் இறந்தார்கள். தைவானுக்கு அருகே சீன விமானம் வீழ்ந்து நொறுக்கியதில் 225 பேர் மரணம். தென்கொரியாவில் சீன விமானம் மலைமீது மோதியதால் 128 பேர் மரணித்தனர்.

* 2001 இல் அமெரிக்கன் எயர்லைன்ஸ் எயர்பஸ் விமானம் நியூயோர்க் நகர விமான நிலையத்தில் இருந்த புறப்பட்ட போது ஓடுதளத்தில் வெடித்தது. இதில் 265 பேர் பலியானார்கள்.

விஞ்ஞான வளர்ச்சி காரணமாக விமான போக்குவரத்தும் அதிநவீனம் மிக்கதாக மாறியிருக்கின்றது. ஆனால், விமான விபத்துகளும் தொடர்ந்த வண்ணமேயுள்ளன.

அவ்வாறு விமான விபத்துக்கள் ஏற்பட என்ன காரணம்? இதுவரை நடந்த விமான விபத்துக்களில் 80 சதவீதமானவை, விமானம் புறப்பட்ட சில நொடிகளிலோ, விமானம் தலையிறங்குவதற்குச் சில நொடிகளுக்கு, முன்னதாகவேதான் நடந்திருக்கின்றன. எனவே அனேகமாக இவை விமானிகளின் தவறுகளாலேயே நடக்கின்றன என்று யூகிக்க முடிகிறது. விமானக் கோளாறுகள் காரணமாக, நடுவானில் விமானங்கள் வெடித்துச் சிதறும் சம்பவங்களும் உண்டு. ஆனால் அது மிகவும் அரிது.

பயங்கரவாதத் தாக்குதல்கள் காரணமாகவும் விமான விபத்துக்கள் நடந்துள்ளன. அதுவும் லொக்கர் பீ விமானக் குண்டு வெடிப்புச் சம்பவம் போன்று ஒன்றோ இரண்டோதான். 1950 ஆம் ஆண்டுமுதல் 2006 ஆம் ஆண்டுவரை இடம்பெற்ற 1843 விமான விபத்துக்களில்..

* விமானியின் தவறால் ஏற்பட்டவை - 53 சதவீதமானவை.

* விமானக்கோளாறினால் ஏற்பட்டவை - 21 சதவீதமானவை

* சீரற்ற காலநிலை - 11 சதவீதம்

* ஏனைய மனிதத் தவறுகள் (தகவல் தொடர்பு, பராமரிப்பு குறைபாடுகள்) - 8 சதவீதம்

* பயங்கரவாதம், மற்றும் சதி - 6 வீதம்

* ஏனைய காரணங்கள் - 1 சதவீதம்

விமானியின் தவறுகள் உள்ளிட்ட மனித வலுக்களாலேயே அதிகளவில் விமான விபத்துக்கள் நடப்பதையே மேற்கண்ட ஆய்வுகள் சுட்டிக்காட்டுகின்றன.

முன்னைய காலங்களில் தயாரிக்கப்பட்ட விமானங்களில் விமானிகள் அழுத்த வேண்டிய பொத்தான்கள் அனேகமாக ஒரே மாதிரியானவை. இதனால் விமானிகள் குழம்பி விமான விபத்துக்கள் ஏற்பட்டுவிடக் கூடாதென்பதற்காகவே நவீன விமானங்கள் விமானிகள் இலகுவில் விமானத்தைக் கையாளக்கூடியவகையில் வடிவமைக்கப்பட்டிருக்கின்றன. அது மாத்திரமன்றி பயணிகளின் பாதுகாப்பிற்கென பல நவீன வசதிகளைக் கொண்டதாக தற்போதைய அனேக விமானங்கள் இருக்கின்றன. பல்லாயிரக்கணக்கான கிலோ மீற்றர்களை விமானம் மூலம் கடந்து செல்கின்றோம். இத்தூரத்தைக் கடக்க, விமானத்தை விடச் சிறந்த போக்குவரத்துச்சாதனம் இல்லை என்பதே நிதர்சனம்.

எனினும் விமானம் ஆகாயத்தில் ஏறும் ஒவ்வொரு தடவையும் எல்லாப் பயணிகளுக்கும் ஒரு அச்சம் எழுந்து அடங்கத்தான் செய்கிறது. ஏனெனில் நாம் இருப்பதோ அந்தரத்தில். என்ன நடந்தாலும் நாம் செய்யக்கூடியது எதுவுமே இல்லை. ஆகவே, மரணம் எப்போது வேண்டுமானாலும் வரும், பாதுகாப்பாக வீட்டில் உறங்கிக் கொண்டிருக்கும் போது கூட என்ற யதார்த்தத்தை விளங்கிக் கொண்டால் விமானப் பயணம் எந்தக் கிலியையும் ஏற்படுத்தாது. இந்த விபத்துக்கள் அனைத்துமே, மனிதன், அவன் எவ்வளவு பெரிய நிபுணத்துவத்தை அடந்திருந்தாலும், தவறு செய்யக்கூடியவனே என்பதைத்தான் புலப்படுத்துகிறது. அது தான் நம்முடைய பலவீனம், எப்போதுமே!