யாழ் சம்பவங்களும் ஊடகங்களும்

யாழ்ப்பாணத்தில் இடம் பெற்று வந்த கொலை, கொள்ளை, ஆட்கடத்தல் சம்பவங்கள் கட்டுப்பாட்டுக்குள் கொண்டு வரப்பட்டுள்ளதாக யாழ் அரசாங்க அதி பர் திருமதி இமெல்டா சுகுமார் தெரி வித்துள்ளார். லண்டன் பி.பி.ஸி. தமிழோசைக்கு கடந்த 26ம் திகதி வழங்கிய செவ்வியிலேயே அவர் இதனைத் தெரிவித்திருந்தார். சுமார் இரண்டு மாதங்களுக்கு மேலாக யாழ் மக்களைப் பீதியில் உறைய வைத்த பல வன்செயல் சம்பவங்கள் தொடர்ச்சியாக இடம்பெற்று வந்திருக்கின்றன. இதன் விளைவாகவே யாழ்ப்பாணத்தில் 24 மணிநேரமும் பொலிஸ் இராணுவ ரோந்து நடவடிக்கைகள் மேற்கொள்ளப்பட்டு வருகின்றன.

கடந்த 20ம் திகதி யாழ் வன்செயல்கள் தொடர்பான ஒத்திவைப்புப் பிரேரணை மீதான விவாதம் பாராளுமன்றத்தில் இடம்பெற்றது. இங்கு உரையாற்றிய பிரதமர் டி.எம். ஜயரட்ண “யாழ்ப்பாணத்தில் இடம்பெறும் வன்முறைச் சம்பவங்களைத் தடுக்க அரசாங்கம் சகல நடவடிக்கைகளையும் எடுத்துள்ளது” என்று குறிப்பிட்டார்.

யாழ்ப்பாணத்தில் இடம்பெற்று வந்த வன்செயல் சம்பவங்கள் சம்பந்தமாக முதன்முதலாக பாராளுமன்றத்தில் பிரச்சினையைக் களப்பி அதனைக் கட்டுப்பாட்டுக்குள் கொண்டுவர வேண்டுமென்று வலியுறுத்தியவர் அமைச்சர் டக்ளஸ் தேவானந்தா. யாழ் மக்கள் பீதியில் உறைந்துள்ளதையும் அவர் பாராளுமன்றத்தில் தெரிவித்திருந்தார்.

இதன் பின்னர் யாழ்ப்பாணத்திலுள்ள சிரேஷ்ட பொலிஸ் அதிகாரிகள், யாழ் வீரசிங்கம் மண்டபத்தில் பாதுகாப்பு நடவடிக்கைகள் தொடர்பான விசேட கூட்டமொன்றினை நடத்தினர். வர்த்தகர்கள், அரசாங்க உயர் அதிகாரிகள், வங்கி அதிகாரிகள், சிவில் சமூகப் பிரநிதிகள் இக்கூட்டத்தில் கலந்து கொண்டனர். இங்கு உரையாற்றிய யாழ்ப்பாண சிரேஷ்ட பொலிஸ் சுப்பிரிண்டன் நெவில் பத்மஹேவா, வன்செயல்களைக் கட்டுப்பாட்டுக்குள் கொண்டுவர பொது மக்களும் வர்த்தகர்களும் எடுக்க வேண்டிய முன்னேற்பாட்டு நடவடிக்கைகள் குறித்து விலாவாரியாக விளக்கினார்.

கடந்த வருடம் டிசம்பர் மாதம் 12ம் திகதி சங்கானை முருக மூர்த்தி அம்மன் ஆலய அர்ச்சகரின் வீட்டுக்குள் புகுந்த கொள்ளையர்கள் மேற்கொண்ட துப்பாக்கிப் பிரயோகத்தில் பூசகர் ஒருவர் கொல்லப்பட்டார். அவரது இரண்டு புதல்வர்கள் கடும் காயத்துக்கு உள்ளானார்கள். கொள்ளையர்கள் நகை, பணம் போன்றவற்றைக் கொள்ளையடித்து விட்டுத் தப்பிச் சென்றனர். பின்னர் பொலிஸார் மேற்கொண்ட விசாரணைகளையடுத்து நால்வர் கைது செய்யப்பட்டனர். கடந்த வருடம் டிசம்பர் 6ம் திகதி யாழ் நகரில் இராணுவத்தினரால் கைது செய்யப்பட்ட ஒருவர், யாழ்ப்பாணத்திலுள்ள மற்றொரு அரசியல் இயக்கத்தில் ஏற்கனவே பணியாற்றியவர் என்று பொலிஸார் தெரிவித்தனர்.

கடந்த வருடம் நவம்பர் மாதம் பதினோராம் திகதி வடமராட்சியிலுள்ள விளாங்காட்டில் வீட்டிலிருந்த இரண்டு பெண்கள் இனந்தெரியாதவர்களால் பாலியல் தொந்தரவுக்கு உள்ளாக்கப்பட்டனர். அதே மாதம் 13ம் திகதி பொலிகண்டி, ஊரி கடற்கரையில் ஆணொருவரின் சடலம் கண்டு பிடிக்கப்பட்டது. ஏற்கனவே காணாமல் போன மனநோயாளியின் சடலம் அதுவென அடையாளம் காணப்பட்டது. பருத்தித்துறை புலோலி தெற்கைச் சேர்ந்த அரியநாயகம் துளசி என்ற 19 வயது இளம் பெண்ணின் சடலம் பாழடைந்த கிணறொன்றிலிருந்து டிசம்பர் மாதம் பதினோராம் திகதி மீட்கப்பட்டது. வலிகாமம் கல்விப் பணிப்பாளர் மார்க்கண்டு சிவலிங்கம் அவரது வீட்டில் வைத்து டிசம்பர் 26ம் திகதி சுட்டுக் கொல்லப்பட்டார். பருத்தித்துறையில் 57 வயதான பெண்ணொருத்தி டிசம்பர் 27ல் குத்திக் கொல்லப்பட்டார்.

உரும்பராயில் 30 வயதான சண்முகநாதன் விக்னேஸ்வரன் வீதியில் சைக்கிளில் சென்று கொண்டிருந்த போது இனந்தெரியாதவர்களால் கடத்தப்பட்டார். இவர் தெல்லிப்பளை புனர்வாழ்வு முகாமிலிருந்து விடுவிக்கப்பட்டவர் என்பது குறிப்பிடத்தக்கது. இவரது சடலம் பின்னர் கண்டு பிடிக்கப்பட்டது. அதே தினம் காணாமல் போனாரென்று கூறப்பட்ட யாழ்ப்பாணத்தைச் சேர்ந்த இராசையா சந்திர சிறி என்ற 42 வயது நபரின் சடலம் மூன்று தினங்களுக்குப் பின்னர் மரமொன்றில் தொங்கியது.

டிசம்பர் மாதம் 31ம் திகதி ஆறு பிள்ளைகளின் தாயாரான யோகநாதன் புஷ்பாதேவி வெள்ளை வானொன்றில் வந்த ஆயுததாரிகளால் வீட்டிலிருந்து அழைத்துச் செல்லப்பட்டார்.

வருட இறுதித் தினமாக டிசம்பர் மாதம் 31ம் திகதி வடமராட்சி குடத்தனையைச் சேர்ந்த தேவராஜா கேதீஸ்வரன் என்ற 28 வயது இளைஞர் இனந்தெரியாத ஆயுத தாரிகளால் சுட்டுக் கொல்லப்பட்டார். இந்த வருடம் ஜனவரி மாதம் முதலாம் திகதி மானிப்பாயில் பெண்ணொருத்தி குத்திக் கொல்லப்பட்ட பின்னர் நகைகள் கொள்ளையடிக்கப்பட்டிருக்கின்றன. அன்றைய தினம் உரும்பிராயில் கோபிநாத் என்ற ஆட்டோ சாரதி காணாமல் போனாரென்று அறிவிக்கப்பட்டது.

கிளிநொச்சி இராஜன் குடியிருப்பு என்ற இடத்திலுள்ள வீடொன்றுக்குள் புகுந்து பத்துப் பவுண் நகைகளையும் இருப்பதாயிராம் ரூபாவையும் கொள்ளையடித்துச் சென்ற ஆறுபேரையும் இராணுவம் பின்னர் கைது செய்தது. இக்கொள்ளைச் சம்பவம் ஜனவரி எட்டாம் திகதி இடம்பெற்றது. சுழிபுரம் சத்திய காடு என்ற இடத்திலுள்ள வீடொன்றுக்குள் கடந்த 10ம் திகதி காலை 8.30 மணியளவில் புகுந்த கொள்ளையர்கள் பதினொரு பவுண் நகைகளைக் கொள்ளையிட்டுச் சென்றனர். தனித்திருந்த எஸ். மலர் என்ற 48 வயதுப் பெண்ணின் வாய்க்குள் துணியைத் திணித்து அவரைக் கட்டிப் போட்ட பின்னரே இந்தத் துணிகரக் கொள்ளை இடம்பெற்றிருக்கின்றது. இந்த சம்பவங்கள் தொடர்பாக கடந்த வாரம் கோப்பாயில் 8 பேரை பொலிஸார் கைது செய்தனர்.

இவை கிட்டத்தட்ட இரண்டு மாதங்களாக யாழ் குடாநாட்டை உலுப்பிய சம்பவங்களில் சில. யாழ்ப்பாணத்தில் குற்றச் செயல்கள் அதிகரித்தமைக்கு இராணுவமும் பொலிஸாருமே காரணமென்று வழமை போன்று தனது புலிச்சார்புப் பாணியில் தமிழ்த் தேசியக் கூட்டமைப்பு எம்.பி. சுரேஷ் பிரேமச்சந்திரன் குற்றஞ்சாட்டியிருந்தார். ஆனால் யாழ். மாநகர சபையின் எதிர்க் கட்சித் தலைவரும் தமிழ் தேசியக் கூட்டமைப்பு உறுப்பினருமான சட்டத்தரணி முடியப்பு ரெமிடியஸ் யாழ்ப்பாண ஊடகங்களையும் சாடுகின்றார். யாழ் பத்திரிகைகள் சம்பவங்களைப் பெரிது படுத்தியும், இல்லாதவற்றை புனைந்தும் செய்திகளைக் கட்டி விடுகின்றன என்றும் அவர் சாடியுள்ளார். யாழ்ப்பாணத்தில் குறிப்பாக பாலியல் வல்லுறவுச் சம்பவங்கள் இடம்பெறுவதாக இல்லாத பொல்லாத செய்திகளை இந்தப் பத்திரிகைகள் சோடித்து எழுதியுள்ளன என்கிறார் அவர். அந்தப் பிரமுகர் சொல்வதில் நிறையவே உண்மைகள் இருக்கின்றன.

யாழ்ப்பாணத்திலும் வன்னியிலும் புலிகளின் அதிகாரம் கோலோச்சிய காலத்தில் புலிகள் சொல்வதைத்தான் எழுத வேண்டுமென்ற நிர்ப்பந்தம் பத்திரிகைகளுக்கு இருந்தது. இல்லையென்றால் நெற்றிப் பொட்டுக்கு நேரே வேட்டு விழும் என்பது எழுதாத விதியாக இருந்தது. தமழ்ச் தேசியக் கூட்டமைப்பு எம்.பி. ஒருவருக்கு சொந்தமான இரண்டு தமிழ்ப் பத்திரிகைகள் அன்றும் இன்றும் இதே கைங்கரியத்தில் ஈடுபடுகின்றன. கருத்துச் சுதந்திரத்துக்காகப் போராடுவதாகக் பீறிக் கொள்ளும் சில பத்திரிகைகள் கயிறு திரிப்புகளைக் கனகச்சிதமாகச் செய்து வருகின்றன.

யாழ்ப்பாணத்தில் வன்முறைகளில் ஈடுபட்டோர் சட்டத்தின் முன்கொண்டு வரப்படுவர் என்று ஜனாதிபதி உறுதியளித்திருக்கின்றார். கொழும்பில் நடைபெற்ற ஊடக நிறுவனங்களின் பிரமுகர்கள் மற்றும் பத்திரிகை ஆசிரியர்கள் கலந்து கொண்ட கூட்டத்தில் உரையாற்றுகையிலேயே ஜனாதிபதி இதனைத் தெரிவித்துள்ளார். தமிழ்ப் பத்திரிகைகள் பொறுப்புணர்வுடன் நடந்து கொள்ள வேண்டுமென்ற அறிவுறுத்தலையும் அவர் அங்கு விடுத்தார்.

இந்த நாட்டில் இனப் பிரச்சினை கூர்மையடைந்தமைக்கும் இன ரீதியான வன்செயல்கள் அதிகரித்தமைக்கும் சிங்கள, தமிழ் ஊடகங்கள் நிறையவே பங்களிப்புச் செய்திருக்கின்றன.

1983 ம் ஆண்டு பதின்மூன்று இராணுவத்தினர் யாழ்ப்பாணத்தில் புலிகளின் தாக்குதலில் கொல்லப்பட்ட பின்னர் ஏற்பட்ட இன சங்காரத்துக்கு ஜே.ஆர். ஜெயவர்தனவின் அரசு மட்டும் காரணமல்ல “பதின்மூன்று சிங்களப் படையினரின் சிதைந்த சடலங்கள் பொலித்தீன் பைகளில் யாழ்ப்பாணத்திலிருந்து கொழும்புக்கு கொண்டு வரப்படுகின்றன” என்று கொட்டை எழுத்துக்களில் பிரசுரித்துக் காடையர்களை உசுப்பேற்றிய சிங்களப் பத்திரிகைகளும் ஒரு காரணம் தான். யாழ்ப்பாணத்தில் 45 ஆயிரம் படையினர் 2000 ம் ஆண்டின் நடுப்பகுதியில் புலிகளின் சுற்றி வளைப்புக்கு உட்பட்டிருந்த வேளையில் தமிழ்த் தேசியக் கூட்டமைப்பின் முன்னாள் எம்.பி. செல்வராசா கஜேந்திரன் பாராளுமன்றத்திலேயே வீர முழக்கமிட்டார். “45 ஆயிரம் சிங்களப் படையினரை பொலித்தீன் பைகளில் சுற்றிக் கொழும்புக்கு அனுப்புவோம்” என்று கர்ஜித்தார். இதனை அநேகமான சிங்கள, தமிழ்ப் பத்திரிகைகள் கொட்டை எழுத்துக்களில் தலைப்புச் செய்தியாக வெளியிட்டன. நல்ல வேளையாக ஓர் இனக்கலவரம் ஏற்படாமல் தடுத்தமைக்காக அன்றைய அரசை பாராட்டித்தான் ஆக வேண்டும்.

மக்கள் மத்தியில் கருத்துருவாக்கங்களை ஏற்படுத்துவதில் ஊடகங்கள் வகிக்கும் பங்கு அளப்பரியது. இதனால்தான் ஆதாரமற்ற, அப்பட்டமான பொய்களைக் கூட ஊடகங்கள் கயிறு திரித்து வெளியிடுகின்றன. ஊடகங்களுக்கு பொறுப்புணர்வு வேண்டும். ஊடக சுதந்திரத்துக்காக கூக்குரலிடுபவர்கள், ஊடகங்களுக்கு சுயதணிக்கை என்ற அவசியமான கட்டுப்பாடும் தேவை என்பதை உணர்ந்து கொள்ள வேண்டும்.

சுஐப் எம். காசிம்