சவூதியில் இருந்து 10 மாதங்களுக்கு பின் தமிழ் பெண்ணின் சடலம்! (படங்கள் இணைப்பு)

சவூதி அரேபியாவில் இறந்த கல்முனையை சேர்ந்த தமிழ் பெண்ணின் உடல் 10 மாதங்களின் பின் கடந்த சனிக்கிழமை இலங்கைக்கு கொண்டு வரப்பட்டு மறுகல்முனை நற்பிட்டிமுனையில் நல்லடக்கம் செய்யப்பட்டது.

காரைதீவில் உள்ள மனித அபிவிருத்தித் தாபனம் மேற்கொண்ட பெருமுயற்சியின் காரணமாக இப்பிரேதம் உரியவர்களால் கொண்டுவரப்பட்டது. இச்சம்பவத்தை ஊடகங்களுக்கு கொண்டு வந்ததன் பலனாகவே இப்பிரேதம் கிடைத்தது. எனவே தாபனத்திற்கும், ஊடகங்களுக்கும் குடும்பத்தினர் நன்றி தெரிவித்தனர். பெண் கடமையாற்றிய சவுதிஅரேபிய வீட்டு எஜமானின் நிதிச் செலவுடன் அந்நாட்டு பிரேத பெட்டியில் பூரண சுகாதார முறையில் இறுக்கி அடைக்கப்பட்ட நிலையில் கல்முனை வந்து சேர்ந்தது.

கல்முனை நற்பிட்டிமுனையிலுள்ள வீட்டில் ஒருநாள் வைக்கப்பட்டு இந்துமுறைப்படி சகல கிரியைகளும் நடாத்தப்பட்டபோதிலும் பெட்டி திறக்கப்ப்படவில்லை. சுகாதார பாதுகாப்பு காரணங்களுக்காக அந்நடவடிக்கை மேற்கொள்ளப்பட்டிருந்தது. மறுநாள் நற்பிட்டிமுனை இந்து மயானத்திற்கு கொண்டு செல்லப்பட்டு அங்கு பொதுச்சுகாதார பரிசோதகர்கள் முன்னிலையில் பெட்டி திறக்கப்பட்டு 15 நிமிடங்களின் பின் உறவினர்களுக்கு காட்டப்பட்டு நல்லடக்கம் செய்யப்பட்டது.

சவூதி அரேபியாவில் இறந்த பெண்மணியின் உடல் 8 மாத காலமாகியும் இலங்கை வரவில்லை.. எனவே உரியநடவடிக்கை எடுத்து சடலத்தை தந்துதவுமாறு உறவினர்கள் வெளிவிவகார அமைச்சிடம் மன்றாட்டமாக கோரிக்கை விடுத்திருந்த செய்தி ஏலவே ஊடகங்களில் வெளிவந்திருந்தமை தெரிந்ததே. இது பற்றி மேலும் தெரியவருவதாவது.

“ கல்முனை, நற்பட்டிமுனை கிராமத்தை சேர்ந்த நான்கு பிள்ளைகளின் தாயாரான கணபதிப்பிள்ளை ரமணி என்ற குடும்ப பெண் குடும்ப கஷ;டம் காரணமாக கடந்த வருடம் ஐனவரி 25 ஆம் திகதி சவூதி அரேபியாவுக்கு வீட்டு வேலைக்கு சென்றார்.

கணவர் காத்தமுத்து வேதானந்தம், பிள்ளைகளான வே.பவித்ரா வயது 26, வே.கேமலதா வயது 23, வே.கோபிகாந்த் வயது 19, வே.மோனிசா வயது 12 ஆகியோரை விட்டு சவூதி சென்றிருந்தார். கடந்த ஜூலை 14 ஆம் திகதி சுகயீனம் காரணமாக இறந்தார் என்று ஓகஸ்ட் 25 ஆம் திகதி வீட்டாருக்கு தகவல் கிடைத்துள்ளது. அத்தினத்தில் அவரின் அப்பாவும் இறந்துள்ளார். துக்கத்தில் இருந்தபோது மற்றும் ஒரு துக்கச் செய்தியும் வீட்டிற்கு வந்து இருந்தது.

கடந்த வாரம் தொலைபேசியில் கதைத்த மனைவி எவ்வாறு சுகயீனம் காரணமாக இறந்திருப்பார்? என சந்தேகம் கொண்டு மரணத்தில் சந்தேகம் உள்ளது, உடன் சட்ட நடவடிக்கையினை மேற்கொண்டு உடலை இலங்கைக்கு அனுப்புமாறு இலங்கை வெளிநாட்டு வேலைவாய்ப்பு பணியகம், வெளிவிவகார அமைச்சு ஆகியவற்றிற்கு கணவர் காத்தமுத்து வேதானந்தம் முறைப்பாடு செய்திருந்தார். பிரேத பரிசோதனையில் அவர் இருதய நோய் காரணமாக இறந்துள்ளதாக தெரிய வந்தது என கடந்த ஐனவரி 20 ஆம் திகதி மருத்துவ அறிக்கையின் பிரதிகளை வெளிநாட்டு அமைச்சு கணவருக்கு அனுப்பியது

அதன் பின்னர் உடலை உடன் இலங்கைக்கு கொண்டு வந்து தருமாறு கேட்டு சம்மதக் கடிதத்தை அமைச்சுக்கு கணவர் சமர்ப்பித்தார். ஆனால் இது வரை உடல் இலங்கைக்கு கொண்டு வரப்படுவதில் நீண்ட தாமதம் நீடித்தது. இதனால் குடும்பத்தினர் செய்வதறியாது உள ரீதியாக பாதிக்கப்பட்டாகள். இவர்களின் நிலைமையினை கருத்திற் கொண்டு குறிப்பிட்ட பெண்ணின் உடலை உடன் இலங்கைக்கு கொண்டு வருவதற்கு தேவையான நடவடிக்கைகளை செய்து தருமாறு உரிய அரச அதிகாரிகளிடம் பகிரங்க வேண்டுதலை விடுத்திருந்தார்hர் அவரின் மகள் வே.கேமலதா. மரணித்த ரமணியின் கணவர் காத்தமுத்து வேதானந்தம் மகள் வே.கேமலதா ஆகியோர் காரைதீவிலுள்ள மனித அபிவிருத்தி தாபனத்திடம் சென்றும் முறையிட்டுள்ளார்.

சம்பந்தப்பட்டவர்கள் இவரது சடலத்தை தருவித்துக் கொடுக்குமாறு மனித அபிவிருத்தி தாபனம் வேண்டுகோள் விடுத்ததோடு நடவடிக்கையில் இறங்கியது. ஆனால் ரமணியின் உடல் இலங்கைக்கு கொண்டு வருவதற்கான ஏற்பாடுகள் தாமதாகவே நடைபெற்றுக் கொண்டிருந்தன. இப்பிரச்சினை தொடர்பாக மனித அபிவிருத்தி தாபனத்தின் கிழக்கு மாகாண இணைப்பாளர் பொன்னையா சிறிகாந் சம்பந்தப்பட்டவர்களோடு தொடர்பு கொண்டார்.

வீரகேசரி, தினகரன், சுடர்ஒளி போன்ற அச்சு ஊடகங்களாலும், இணைய ஊடகங்களான தெரண, தமிழ். சி. என். என், காரைதீவு நியுஸ், பெற்றிநியுஸ் போன்றனவும், இலத்திரனியல் சர்வதேச ஊடகமான BBC தமிழ்ஓசை, வானொலி ஊடாகவும் பரவலாக இவ்விவகாரம் வெளிக் கொணரப்பட்டது. BBC தமிழ் ஓசை ரமணியின் குடும்பத்தினருடனும், இலங்கை வெளிநாட்டு வேலைவாய்ப்பு பணியகம், வெளிவிவகார அமைச்சுடனும் மற்றும் சவூதியில் உள்ள இலங்கை தூதுவராலயத்துடனும் தொடர்புகளை மேற்கொண்டு தகவல் சேகரித்து செய்தி வெளியிட்டது.

இவற்றால் ரமணியின் பூதவுடலை இலங்கைக்கு கொண்டு வருவதற்கான செயற்பாடு விரைவாக்கப்பட்டது. தலைமறைவாகி இருந்த எஜமானன் பொலிஸாரால் பிடிக்கப்பட்டமையும் குறிப்பிடத்தக்கது. ”

Share |