தாய்வானில் வசிக்கும் இலங்கையரிடம் 1.7 மில்லியன் ரூபா மோசடி செய்த நபர்
பொலிவூட் நடிகை ஐஸ்வர்யா ராயுடன் காதல் தொடர்பினைக் கொண்டிருந்ததாகக் கூறும் தாய்வானில் வசித்துவரும் இலங்கையர் ஒருவர் தனது காதல் விவகாரத்தால் ஏற்பட்ட மன உளைச்சலுக்கு நஷ்ட ஈட்டினைப் பெற்றுக்கொள்ள நடவடிக்கைகளை முன்னெடுக்குமாறு கோரி தனது மருமகனிடம் 1.7 மில்லியன் ரூபாவை கொடுத்ததாகவும் அதனை அவர் மோசடி செய்துவிட்டதாகவும் மேற்படி நபர் கொழும்பு மோசடி தடுப்புப் பிரிவில் முறையிட்டுள்ளார்.
தற்போது தாய்வானில் வசித்து வரும் இலங்கையரான நிரோஷன தேவப்பிரிய என்பவரே இவ்வாறு முறைப்பாடு செய்தவராவார். அவர் தனது முறைப்பாட்டில் மேலும் தெரிவித்துள்ளதாவது,
இந்திய பிரபல பொலிவூட் நடிகையான ஐஸ்வர்யா ராயுடன் நான் காதல் தொடர்பினைக் கொண்டிருந்தேன். அதன் பின்னர் அவர் இந்தி நடிகர் மற்றும் இயக்குநரான அபிஷேக் பச்சனை திருமணம் செய்து கொண்டதனால் நான் மன உளைச்சலுக்கு உள்ளாகியிருந்தேன். இவ்வாறு ஏமாற்றப்பட்டதன் பின்னர் நான் மிகுந்த மன உளைச்சலுக்கு ஆளானேன். ஆகையால் நடிகை ஐஸ்வர்யா ராயிடம் நஷ்டஈடு கோரவேண்டும் என தீர்மானித்தேன்.
அதனடிப்படையில் பாணந்துறையில் வசித்து வரும் எனது மருமகனான ரொஷான் அஜித்திடம் இவ்விடயம் குறித்து தெரிவித்தேன். இப்பொறுப்பை தன்னிடம் ஒப்படைக்குமாறு கூறிய மருமகன், இலங்கையில் வழக்கு தாக்கல் செய்வதென்றால், சட்டத்தரணிக்கு செலுத்துவதற்கும், வழக்கு சம்பந்தமான மற்றைய அனைத்து செலவுகளுக்கும் 1.7 மில்லியன் ரூபா அவசியம் என்றும் அத்தொகையை தன்னிடம் தருமாறும் கேட்டார்.
அந்த பணத்தை நான் செலுத்தியிருந்தும் அவ்வாறான வழக்கிற்கான எந்தவொரு நடவடிக்கையையும் மருமகன் எடுக்கவில்லையென தெரியவந்தது. அதன் பின்னரே இம்முறைப்பாட்டை செய்துள்ளேன் என குறிப்பிடப்பட்டுள்ளது.
இந்நிலையில் தாய்வானில் வசிக்கும் குறித்த இலங்கையரை மோசடி செய்ததாக கூறப்படும் நபரை கொழும்பு, கோட்டை நீதிவான் நீதிமன்றின் பிரதான நீதிவான் திலின கமகே முன்னிலையில் கொழும்பு மோசடி தடுப்புப் பிரிவினர் ஆஜர் படுத்தினர்.
இதன் போது மோசடி செய்ததாகக் கூறப்படும் நபர் , தான் மோசடி செய்த பணத்தை தவணைமுறையில் திருப்பிக்கொடுப்பதாக அவர் ஒப்புக்கொண்டுள்ளார். தான் மோசடி செய்த பணத்தில் மாதாரந்த தவணைக்கட்டணமாக ஒரு மில்லியன் ரூபாவை செலுத்தவும் சந்தேக நபர் இணக்கம் தெரிவித் துள்ளார். இதனையடுத்து ஐந்து இலட்சம் ரூபா பெறுமதியான இரு சரீரப்பிணையில் அவரை நீதிவான் திலின கமகே விடுதலை செய்தார்.
(எம்.எப்.எம்.பஸீர்)
.jpg)
கருத்துகள் இல்லை:
கருத்துரையிடுக