பள்ளிக்கூடக்காணி ஆஸ்பத்திரிக்காணி எல்லாத்தையும் தனக்கு வேண்டிய ஆக்களுக்குக் குடுக்கிறதுக்கு அலுவல் பாக்கிற ஆள் எண்டால்... குலத்தார் என்ன குறைஞ்ச ஆளே...?
'சும்மா போங்கோ அண்ணை இவர் இந்தமாதிரியான அரும்பெரும் பணிகளை தன்ரை கல்விச் சேவைக்காலத்திலயும் செய்தவர். இப்ப அரசியல்வாதியாக இருக்கிற காலத்திலயும் செய்து கொண்டிருக்கிறார்' எண்டு சொல்கிறார் குலத்தாரோட ஒண்டாக வேலைசெய்து போட்டு இப்ப வந்து இஞ்ச மாகாணசபையில வேலை செய்யிற ஒரு அதிகாரி.
ஆஸ்பத்திரி பள்ளிக்கூடம் வாய்க்கால் குளம் எண்ட பொது இடங்களுக்கெண்டு ஒதுக்கப்பட்ட பொதுக்காணிகளைத் தனிப்பட்ட தேவைகளுக்காக அடாத்துப் பண்ணுகிற ஆட்களிட்டையிருந்து பாதுகாக்க வேண்டிய பொறுப்பும் கடமையும் படிச்சவைக்கும் பதவியில இருக்கிறவைக்கும் உரியதல்லோ.
இதை ஆரும் மறுக்கேலாமோ!
ஆனால் இந்தப் பெரிய படிப்பாளி தன்ரை வீட்டுக்கு முன்னுக்கிருக்கிற ஆஸ்பத்திரிக்காணியை தனக்கு வேண்டிய ஆறு ஏழு குடும்பத்துக்கு எடுத்துக் குடுக்கிறதுக்கு படாத பாடெல்லாம் படுகிறார்.
இதுக்காக அவர் கொஞ்ச நாளைக்கு முதல் கண்டாவளை ஏ.ஜீ.ஏ கந்தோருக்குள்ளாலை அலுவல் பாத்திருக்கிறார்.
அங்க இருக்கிற காணி உத்தியோகத்தர் தொடக்கம் அதுக்கு மேல கீழ இருக்கிற அதிகாரிகள் உத்தியோகத்தர் மாரிட்ட எல்லாம் கேட்டுக் கெஞ்சிப்பார்த்தார். போனுக்கு மேல போன் அடிச்சு கொஞ்சம் இறுக்கமாகக் கதைச்சும் பார்த்தார்.
ஒண்டும் சரிப்பட்டு வரேல்ல.
இந்தக்காணி பரந்தன் - முல்லைத்தீவில இருக்கிற தருமபுரம் ஆஸ்பத்திரிக்கு உரித்தானது எண்டு இந்தக்காணியில இருக்கிற குடும்பங்களுக்கு எதிராக கிளிநொச்சிக் கோட்டில (நீதிமன்றத்தில) வழக்கு நடந்து கொண்டிருக்கு.
இந்த வழக்கைப்போட்டதே ஏ.ஜீ.ஏ கந்தோர்தான்.
அப்பிடியிருக்க இவர் குலத்தார் உள்ளால சுழிச்சு விளையாட ஆரும் விடுவினமா?
ஆனால் குலத்தாரும் இதை விடுகிறதாக இல்லை.
ஏனெண்டால் இந்தக் காணியில இருக்கிற ஆட்கள் ஐயாவுக்கு வேண்டியவையல்லோ. தேர்தலிலயும் இவை ஐயாவுக்காகத்தான் வேலை செய்தவை.
அதோட 'நாங்கள் உங்களுக்கு வோட்பண்ணிறம். நீங்கள் வெண்ட கையோட இந்தக் காணிப்பிரச்சினையை எங்களுக்கு முடிச்சுத்தரோணும்...' எண்டு ஒரு நிபந்தனையையும் ஐயாவிட்ட இவை வைச்சிருந்தவை.
குலத்தாரும் நக்குண்டார் நாவிழந்தார் எண்ட கணக்கில எப்பிடியாவது தான் பட்ட கடனுக்கு இந்தக் காணிகளை எடுத்து அந்தக் குடும்பங்களுக்குக் குடுக்கோணும் எண்டு ராப்பகலாக மண்டையைப்போட்டு உடைச்சுக் கொண்டிருக்கிறார்.
அப்பதான் ஆளுக்கு ஒரு ஐடியா வந்திது. பேசாமல் வட மாகாண சுகாதார அமைச்சைச் சேர்ந்தவையை வைச்சு இந்தக் காணிகளை மடக்கி தன்ரை ஆக்களுக்குக் குடுக்கலாம்.. எண்டு.
உடனயே சிங்கன் களத்தில இறங்கிக் காரியத்தைப் பார்க்கத் தொடங்கீட்டார்...
இதுக்காக போன 24.05.2014 ஆந் திகதி தருமபுரத்துக்கு சுகாதார அமைச்சின்ரை ஆக்களைக் கூட்டிக் கொண்டு வந்து வலு ரகசியமாகக் காயை நகர்த்த வெளிக்கிட்டார்.
அப்பதான் மச்சானுக்குச் சனியன் பிடிக்கத் தொடங்கினது.
இவர் காணியைச் சுத்திக் காட்ட இதைப் பார்த்துக் கொண்டு போன ஆட்கள் ஊருக்குள்ள போய்ச்சொல்ல....
ஆஸ்பத்திரிக்காணியை இப்படி தனிப்பட்ட ஆக்களுக்குக் குடுத்து அநியாயம் பண்ண விடமாட்டம் எண்டு ஊரெல்லாம் அமர்க்களம் தொடங்கீட்டுது...
இதை எதிர்த்துச் சனங்கள் மாகாணசபைக்கும் கோட்டுக்கும் ஊர்வலம் போகவும் தயாராகீட்டினம்.
கிளிநொச்சி நகரப்பகுதிக்கு அடுத்ததாக தருமபுரம்பகுதிதான் சனத்தொகை கூடின பகுதி. அப்பிடியெண்டால் அங்க ஒரு நல்ல பெரிய ஆஸ்பத்திரி கட்டாயம் தேவையல்லோ.... இதுக்கெண்டு காசும் ஒதுக்கப்பட்டு வந்திருக்கு.
இந்தக் காணிப்பிரச்சினையை தீர்த்து வைச்சால் நல்லதொரு ஆஸ்பத்திரியைக் கட்டலாம் எண்டு சுகாதாரப் பணிப்பாளர் தொடக்கம் ஏஜீஏ ஒபிஸ்காரர் ஊரில இருக்கிற நலன் விரும்பிகள் எல்லாரும் முயற்சி எடுத்து கொண்டிருக்கேக்கதான் குலத்தார் இப்பிடிக் குறுக்கால அறுக்கிறார்.
குலத்தாருக்கு ஒண்டைச் சொல்கிறன்.
சத்தியமாக இது ஒரு சுத்தமான அநியாயம். தருமபுரம் சனத்துக்கு மட்டுமில்ல அந்தச் சுற்றுவட்டாரத்தில இருக்கிற ஆயிரக்கணக்கான குடும்பங்களுக்கு நீங்கள் செய்யிற பச்சைத் துரோகம் இது.
இந்தச் சனங்கள் உங்களைப்போல வெளிநாடுகளுக்குப் பிள்ளையளை அனுப்பிப்போட்டு பதவி புகழுக்காக அரசியல் செய்யிற ஆட்களில்லை.
அத்தினையும் ஏழைச்சனங்கள்.
உங்களுக்கு வேண்டிய – நீங்கள் விரும்பிய ஆக்களுக்கு இனிப்புக் குடுக்கிறதெண்டால் நல்லாய்க்குடுங்கோ...
ஆனால் அதை உங்கட சொந்தச் செலவில குடுங்கோ... ஆஸ்பத்திரிக்கு முன்னால் நீங்களும் ஏக்கர்கணக்கில காணி வைச்சிருக்கிறியள்...
இப்பிடி அரசாங்கக் காணியில ஆஸ்பத்திரிக்காணியில அதைச் செய்யாதையுங்கோ...
ஒரு காலம் தருமபுரத்தில கொம்யுனிஸ்ற் பாட்டிக்காரர் செய்த தொண்டையும் இப்ப குலத்தார் செய்கிற இந்தக் கேவலத்தையும் விசயம் விளங்கின ஆட்கள் ஒப்பிட்டுப்பார்க்கோணும்...
அப்பதான் தெரியும் நன்மை எது தீமை எது எண்டு...
-வடபுலத்தான்
.jpg)
கருத்துகள் இல்லை:
கருத்துரையிடுக