ஆட்டங்காண வைத்துள்ள உலக அந்தரங்கங்கள்

“விக்கிலீக்ஸ்' என்ற என்ற இந்த இணையத்தளம், பெயர் அறிவிக்காத தனிநபர் பங்களிப்புக்களையும், அரசாங்கங்கள், நிறுவனங்கள் மற்றும் சமய ஸ்தாபனங்களின் பாதுகாக்கப்பட்ட இரகசிய ஆவணங்களிலிருந்து சட்டபூர்வமற்ற முறையில் பெறப்பட்ட தகவல்களையும் வெளியிட்டு பெரும் பரபரப்பை ஏற்படுத்தியுள்ளது இவ்வாறு சர்வதேச முக்கிய இரகசியங்களை வெளியிட்டுள்ள இந்த இணையத்தளமானது சுவீடனிலிருந்து இயங்கிக்கொண்டிருக்கின்றது. என்பதை மட்டுமே தற்போது அறிந்து கொள்ளமுடிகின்ற அதேவேளை இந்த இணையத்தளத்தின் பங்களிப்பாளர்களின் விபரங்களையோ அல்லது முக்கிய ஆவணங்களை பெற்றுக்கொண்ட வழிறைகளைப் பற்றியோ அறிய இயலாதவாறும் தேடவியலாதவாறும் இரகசியங்கள் பேணப்பட்டுள்ளன. இது மாத்திரமன்றி இவ் இணையத்தளமானது நிறுவிய ஓராண்டுக்குள்ளேயே அம்பலத்துக்குவராத 1.2 மில்லியன் முக்கிய ஆவணங்களை தரவிறக்கியுள்ளது. இந்த ஆவணங்களில் மூவாயிரத்துக்கும் அதிகமான ஆவணங்கள் இலங்கை சம்பந்தப்பட்டவை என்பதும் குறிப்பிடத்தக்கது. சர்வதேச நாடுகளின் அரசியல் அந்தரங்க இரகசியங்கள் மற்றும் அந்தந்த நாடுகளின்அமெரிக்க தூதரங்களுக்கிடையில் பரிமாறிக்கொண்ட விடயங்கள் ஆகியவற்றை துல்லியமாக பரகசியப்படுத்தியது விக்கிலீக்ஸ். இதனால் குறிப்பாக அமெரிக்கா பெரும் நெருக்கடிக்குள் தள்ளப்பட்டுள்ளது.

இந்த இராஜதந்திர விடயங்களை உள்ளடக்கிய விக்கிலீக்ஸின் கேபிள்களால் முன்னொருபோதுமில்லாத வகையில் தனது நேச அணியான பிரிட்டன் உட்பட உலகிலுள்ள பல்வேறு நாடுகளுடன் இராஜதந்திர நெருக்கடியை அமெரிக்கா எதிர்நோக்கியுள்ளது.

இதில் பாரதூரமான விடயமாகக் காணப்படுவது ஐ.நா.விலுள்ள இராஜதந்திரிகள் மீது உளவு நடவடிக்கைக்கு அமெரிக்கா உத்தரவிட்டிருந்ததாக விக்கிலீக்ஸால் கசியவிடப்பட்டிருக்கும் ஆவணம் ஆகும்.

உலகளாவிய ரீதியிலுள்ள அமெரிக்க தூதரகங்களில் பணிபுயும் அதிகாரிகளிடம் வெளிநாட்டு அதிகாரிகள் பயணம் செய்யும் விமான இலக்கங்கள், கடனட்டை விபரங்கள்,கைவிரல் அடையாளங்கள், மரபணுக்கள் என்பவற்றைப் பெற்றுக்கொள்ளுமாறு அமெரிக்க வெளிவிவகார அமைச்சர் ஹிலாரி கிளின்டன் உத்தரவிட்டிருப்பதாகத் தெரிவிக்கப்பட்டிருக்கிறது.

இவ் இணையத்தளத்தின் வசமுள்ள 251287 அமெரிக்க இராஜதந்திர இரகசிய ஆவணங்களில் 3000 இற்கும் மேற்பட்டவை இலங்கை தொடர்பானவையாகும் என தெரிவிக்கப்பட்டுள்ளது.இதில் சீனா தொடர்பான 8320ஆவணங்களும் ஆப்கானிஸ்தான் தொடர்பாக 4775 ஆவணங்களும் இந்தியா தொடர்பாக 5087 ஆவணங்களும் பங்களாதேஷ் தொடர்பாக 2182 ஆவணங்களும் அடங்கியுள்ளன.

ஈரானின் அணு உலைகளை அழிக்கும்படி சவூதி அரேபிய மன்னர், அமெரிக்காவை வற்புறுத்தியது, ரஷ்ய அதிபர் விளாடிமிர் புடினுக்கு, “அல்பா டோக்' என பட்டப்பெயர் இட்டது போன்ற பல்வேறு பரபரப்புத் தகவல்கள் அவற்றில் அடங்கியுள்ளன. “விக்கி லீக்சின்' இந்தச் செயலுக்கு அமெரிக்கா கடும் கண்டனம் தெரிவித்துள்ளது. பரபரப்பான செய்திகளை வெளியிடுவதற்குப் பெயர் பெற்ற “விக்கிலீக்ஸ்' இணையத்தளம், ஆப்கானிஸ்தானில் அமெரிக்காவின் போர் அட்டூழியத்தை 90 ஆயிரம் ரகசிய ஆவணங்கள் மூலமும், ஈராக்கில் நடந்த அமெரிக்க அட்டூழியத்தை நான்கு லட்சம் ரகசிய ஆவணங்கள் மூலமும் வெளிப்படுத்தியது. இதனால் எரிச்சல் அடைந்த அமெக்கா, “விக்கிலீக்ஸ்' இணையத்தள நிறுவனர் ஜூலியன் அசேஞ்ச் மீது பாலியல் குற்றச்சாட்டுகளை சுமத்தி அவரை துரத்த ஆரம்பித்தது.
சமீபத்தில் அவரைக் கைது செய்வதற்கு சுவிட்சர்லாந்து நீதிமன்றம் ஒன்று உத்தரவிட்டது.

இந்நிலையில், அமெரிக்கா பல்வேறு நாடுகளிடம் கொண்டுள்ள வெளியுறவுக் கொள்கைகள் குறித்த ரகசிய ஆவணங்களை வெளியிடப் போவதாக ஜூலியன் சமீபத்தில் தெரிவித்தார்.

அவற்றை வெளியிடக் கூடாது எனக் கூறிய அமெரிக்கா, அவற்றைத் தன்னிடம் ஒப்படைக்க வேண்டும் என மிரட்டலும் விடுத்தது. தன் கூட்டணி நாடுகளான இந்தியா, பிரிட்டன் உள்ளிட்ட பல்வேறு நாடுகளுக்கு முன்னெச்சரிக்கையும் விடுத்தது.

ஆனாலும் சொன்னபடியே, ஜூலியன், பிரிட்டனில் இருந்து வெளியாகும், “தி கார்டியன்', நியூயோர்க்கின் “தி நியூயோர்க் டைம்ஸ்', ஜெர்மனியின் “டெர் ஸ்பைஜெல்', பிரான்சின், “லீ மாண்டே', ஸ்பெயினின் “எல் பைஸ்' ஆகிய ஐந்து பத்திரிகைகள் மூலம், இரண்டு லட்சத்து 50 ஆயிரத்துக்கும் மேற்பட்ட ரகசிய ஆவணங்களை நேற்று முன்தினம் இலங்கை நேரப்படி நள்ளிரவில் வெளியிட்டார். இந்த ஆவணங்கள் மூலம் உலக நாடுகளை அமெரிக்க கண் ணோட்டம், அமெரிக்கத் தூதரக அதிகாரிகள் ஒற்றர்களாக வேலை பார்த்தது, சின்னச் சின்ன தீவுகளில் இருந்து தனது அமைச்சரவையில் உள்ள ஹிலாரி கிளின்டன்வரை அனைவரையும் அமெரிக்கா உளவு பார்த்தது என, அமெரிக்காவின் அனைத்து நடவடிக்கைகளும் இப்போது வெளியுலகுக்குத் தெரியவந்துள்ளன.


ஆவணங்கள் கிடைத்தன எப்படி?
ஈராக் தலைநகர் பக்தாத் நகரின் வெளிப்புறப் பகுதியில் இருந்த அமெரிக்கப் படைத்தளத்தில் பிரேட்லி மேன்னிங் (22) என்ற வீரர், அமெரிக்க தூதரகங்களின் இணையத்தளங்களில் இருந்து மிக ரகசியமாக இந்த விவரங்களை “சிடி' யில் பதிவு செய்தார்.
இதற்காக ஒரு நாளில் 14 மணிநேரம் செலவிட்டுள்ளார். இப்படி எட்டு மாதங்களுக்கும் மேல் செலவிட்டு இவ்விவரங்களைப் பதிவு செய்துள்ளார்.
மொத்தம் 1.6 கிகாபைட்ஸ் கொண்ட அனைத்தையும் ஒரு “தம்ப் டிரைவ்' இல் பதிவு செய்து, “விக்கி லீக்ஸ்' இணையத்தளத்திற்கு அளித்துள்ளார். ஏழு மாதங்களுக்கு முன் அமெரிக்க அதிகாரிகளால் கைது செய்யப்பட்டுள்ள இவர், 2011ல் நீதிமன்ற விசாரணைக்கு உட்படுத்தப்பட இருக்கிறார்.


இந்தியா பற்றிய ரகசிய ஆவணங்கள்
“விக்கி லீக்ஸ்' வெளியிட்டுள்ள ரகசிய ஆவணங்களில் டில்லியில் உள்ள அமெரிக்க தூதரகத்தில் இருந்து அனுப்பப்பட்டவற்றில் இருந்து எடுக்கப்பட்ட மூவாயிரத்து 38 ரகசிய ஆவணங்களும் உள்ளன. “விக்கி லீக்ஸ்' இணைத்யதளம் நேற்று முன்தினம் இவற்றை வெளியிட்ட போது, உலகம் முழுவதும் அந்த இணையத்தளத்தை லட்சக்கணக்கானோர் பார்த்ததால், தொழில்நுட்ப ரீதியில் கோளாறு ஏற்பட்டது. இதனால் இந்தியா பற்றி என்னென்ன விவரங்கள் அவற்றில் கூறப்பட்டுள்ளன என்பது தெரியவரவில்லை. எனினும், பாக்., பிரச்னை குறித்து ஆப்கானில் இந்தாண்டு துவக்கத்தில் நடந்த கூட்டத்தில் இந்தியா விலக்கி வைக்கப்பட வேண்டும் என துருக்கி விரும்பியதால், இந்தியா அழைக்கப்படவில்லை என்பது தெரியவந்துள்ளது. அதேநேரம், நேபாளத் தலைநகர் காத்மாண்டுவில் இருந்து இரண்டாயிரத்து 278 ஆவணங்களும், இலங்கை தலைநகர் கொழும்பில் இருந்து வாயிரத்து 325 ஆவணங்களும், பாக்., தலைநகர் இஸ்லாமாபாத்தில் இருந்து இரண்டாயிரத்து 220 ஆவணங்களும் வெளியாகியுள்ளன. இவற்றில் அந்தந்த நாடுகளில் உள்ள அமெரிக்க தூதரகங்களின் தினசரி நடவடிக்கைகள், கூட்டங்கள் பற்றிய தகவல்கள் குறிப்பிடப்பட்டுள்ளன.

பாகிஸ்தான் யுரேனியத்தைக் கைப்பற்ற அமெரிக்கா முயற்சி

அணுகுண்டு தயாரிக்க உதவும் செறிவூட்டப்பட்ட யுரேனியத்தை பாகிஸ்தானின் அணு உலையில் இருந்து எப்படியாவது அகற்றி விட வேண்டும் என்று அமெரிக்கா பல ஆண்டுகளாக முயன்றதையும், அம்முயற்சி தோல்வியில் முடிந்ததையும் “விக்கிலீக்ஸ்' ரகசிய ஆவணங்கள் வெளிப்படுத்தியுள்ளன.
அந்த ஆயுதங்கள் தலிபான்களின் கைகளில் சிக்கிவிடக் கூடும் என அமெரிக்கா பயப்பட்டது. ஆனால், பாகிஸ்தான், வெளியிட்ட அறிக்கையில் அணு ஆயுதங்கள் பத்திரமாக இருப்பதாகத் தெரிவித்துள்ளது.

அமெரிக்கா கடும் கண்டனம்

“விக்கி லீக்ஸ்' ரகசிய ஆவணங்களை வெளியிட்டதற்கு அமெரிக்கா கடும் கண்டனம் தெரிவித்துள்ளது. வெள்ளை மாளிகை ஊடகச் செயலர் ரொபர்ட் கிப்ஸ் வெளியிட்டுள்ள அறிக்கையில்,“தனிநபர்கள், உலக நாடுகளின் அரசுகள், எதிர்க்கட்சித் தலைவர்கள் என, அனைவரது உரையாடல்களையும் வெளியிட்டுள்ள “விக்கி லீக்சின்' இச்செயல், சட்டவிரோத மானது. இதனால் அமெரிக்க வெளியுறவு நலன்கள் மட்டுமல்லாது, அமெரிக்க கூட்டணி மற்றும் நட்பு நாடுகளின் நலன்களும் பாதிக்கப்படும்' என தெரிவிக்கப்பட்டுள்ளது.

ஈரானை தாக்க சவூதி வற்புறுத்தல்

அணு ஆயுதங்களைத் தயாரிப்பதில் முனைந்துள்ள ஈரான் மீது போர் தொடுத்து, அதை அழிக்க வேண்டும் என சவூதி அரேபிய மன்னர் அப்துல்லா, பஹ்ரைன் மன்னர் ஹமாத், அபுதாபி மன்னர் ஷேக் முகமது ஆகியோர் தொடர்ந்து அமெரிக்காவை வற்புறுத்தியுள்ளனர். சவூதி மன்னர், “அந்தப் பாம்பின் தலையை வெட்டி விடுங்கள்' என ஈரான் குறித்து கூறியுள்ளதாக ஆவணங்கள் கூறுகின்றன.

ஐ.நா.வில் பணியாற்றும் முக்கிய உயரதிகாகளின் டி.என்.ஏ.,சாம்பிள், கைவிரல் ரேகைகள் பற்றிய விவரங்கள், அவர்களின் இமெயில்கள், “பாஸ்வேர்டு'களும் அமெரிக்காவால் சேகரிக்கப்பட்டன. அவர்கள் தொடர்ந்து கண்காணிக்கப்பட்டனர்.

சீனாவில் இயங்கிய “கூகுள்' இணையத்தளச் சேவைகளில் சில இன்டெர்நெட் திருடர்கள் ஊடுருவி ஆவணங்களைத் திருடியதன் பின்னணியில் சீன அரசு இருப்பதாக அமெரிக்கா சந்தேகப்பட்டது. அமெரிக்க அரசு, தொழிலதிபர்கள் மற்றும் தலாய் லாமா ஆகியோரின் கம்பியூட்டர்களில் சீன அரசால் ஏற்பாடு செய்யப்பட்ட நெட் திருடர்கள் புகுந்து தகவல்களைத் திருடியுள்ளனர்.

வடகொரியா அழிக்கப்பட்ட பின் ஒன்றிணைந்த கொரிய தீபகற்பத்தை உருவாக்குவது குறித்து, அமெரிக்காவும் தென்கொரியாவும் ஆலோசித்துள்ளன.
இதற்காக சீனாவுக்கு சில வர்த்தக சலுகைகளை தென்கொரியா ஏற்படுத்தித் தர வேண்டும் என, அமெரிக்க தூதர் தென்கொரியாவுக்கு ஆலோசனை கூறியுள்ளார்.
இரட்டைக் கோபுர தகர்ப்புக்கு இரண்டாண்டுகள் முன்பு, பாகிஸ்தானில் இருந்த அமெரிக்க உயரதிகாரிகள், ஒசாமா பின்லாடனுக்கு எதிராகப் போர் தொடுப்பது பற்றி அமெரிக்கா தீவிரப் பிரசாரம் செய்ய வேண்டும் என விரும்பினர்.

ஆப்கான் துணை ஜனாதிபதி கடந்தாண்டு, ஐக்கிய அரபு எமிரேட்சுக்குச் சென்ற போது அவரை 240 கோடி ரூபாயோடு, அந்நாட்டு அதிகாரிகள் பிடித்தனர். அப்போது அமெரிக்கா தலையிட்டு அவரை விடுவித்தது.

வடகொரியாவில் இருந்து ஈரானுக்கு அனுப்பப்பட்ட ஏவுகணைகள் அடங்கிய கப்பலை உடனடியாகத் தடுத்து நிறுத்தும்படி சீனாவை அமெரிக்கா வற்புறுத்தியது. அந்த ஏவுகணைகள் மூலம் ஈரான், இஸ்ரேல் மற்றும் ஐரோப்பிய நாடுகளைத் தாக்கக் கூடும் என அமெரிக்கா நம்பியது.

யேமன் அதிபர், அமெரிக்காவின் ஆசியப் படைகளுக்கான தளபதி ஜெனரல் டேவிட் பெட்ரசிடம், ஏமனில் உள்ள அல் குவைதா பயங்கரவாதிகளை அழிப்பது குறித்துப் பேசிவிட்டு, “வெடிகுண்டுகள் எங்களுடையவை, அமெரிக்காவினது அல்ல என்று தொடர்ந்து நாங்கள் கூறுவோம்' என்கிறார்.

சர்ச்சை ஜூலியன்
பல்வேறு அரசுகளின் ரகசிய ஆவணங்களை வெளியிட்டு பரபரப்பைக் கிளப்பும் இணையத்தளம்தான் “விக்கிலீக்ஸ்'.
அவுஸ்திரேலியாவைச் சேர்ந்தவரும், இணையத்தளங்களில் இருந்து தகவல்களைத் திருடுவதில் கைதேர்ந்தவருமான ஜூலியன் அசேஞ்ச் என்பவர்தான் இதன் நிறுவனர்.

ஆப்கானிஸ்தானில் அமெரிக்க அட்டூழியம் குறித்து 90 ஆயிரம் ஆவணங்கள், ஈராக்கில் அமெரிக்க அட்டூழியம் குறித்து நான்கு லட்சம் ஆவணங்கள் இதுவரை இந்த இணையத்தளத்தால் வெளியிடப்பட்டுள்ளன. ஈராக் தலைநகர் பக்தாத் அமெக்க ஹெலிகொப்டர் ஒன்று பொதுமக்களைச் சுட்டுக் கொன்ற வீடியோவையும் வெளியிட்டுள்ளது.

அமெரிக்க ஜனாதிபதி பதவிக்குப் போட்டியிட்ட சாரா பாலின் என்பவரின் இமெயிலில் இருந்து சர்ச்சைக்குரிய தகவல்களை வெளியிட்டுள்ளது.

விளாடிமிர் புட்டினுக்கு நாயின் பெயர், பிரிட்டன் அரச குடும்பத்தைச் சேர்ந்த ஆன்ட்ரூ என்பவரின் தவறான நடத்தை, மற்றும் பிட்டன் பிரதமர் டேவிட் கேமரூன் பற்றிய விமர்சனம் இந்த ஆவணங்களில் வெளியிடப்பட்டுள்ளன.

ஐரோப்பிய தலைவர்களில் வலிமையற்றவர், முட்டாள், திறமையற்றவர் என, இத்தாலி பிரதமர் சில்வியோ பெர்லுஸ்கோனியை ரோமில் உள்ள அமெரிக்க தூதர் குறிப்பிடுகிறார்.

லிபியா தலைநகர் டிரிபோலியில் உள்ள அமெரிக்க தூதரகம், லிபியா அதிபர் கடாபி, தனது உக்ரேனிய நாட்டு நர்ஸ் பெண் ஒருவருடன் எப்போதும் திரிவதாகவும், மிக உயரமான கட்டடங்களில் தங்குவதற்கு அவர் பயப்படுவதாகவும் தெரிவித்துள்ளது.

ரஷ்யாவில் உள்ள அமெரிக்க தூதரகம், ரஷ்ய பிரதமர் விளாடிமிர் புட்டினை “அல்பா டோக்' என்று குறிப்பிடுகிறது.
மேலும், இத்தாலி அதிபருக்கும் அவருக்கும் இடையில் உள்ள நெருக்கத்தைப் பற்றியும் விமர்சிக்கிறது.

வடகொரிய ஜனாதிபதி கிம் ஜாங் இல், “வயதான பேர்வழி' என்றும், ஈரான் ஜனாதிபதி அகமதி நிஜாத், “ஹிட்லர்' என்றும் விமர்சிக்கப்படுகின்றனர்.

தென்னாபிரிக்காவின் வெளியுறவு அமைச்சர், சிம்பாப்வே ஜனாதிபதியுடன் ஒப்பிடப்பட்டு “பித்துப்பிடித்த வயதானவர்' என்று கூறப்படுகிறார்.

நன்றி: இணையம்