மனிதராகப் பிறந்த ஒவ்வொருவருனுக்கும் இறப்பு என்பது நிச்சயம் வந்தே தீரும். அதனை அனைவரும் சந்தித்தே ஆகவேண்டும். இதுவே உலக நியதி. எனினும் பலர் வீணாக தமது உயிரை மாய்த்துக்கொள்கின்றனர். புகைப்பிடிக்கும் பழக்கத்திற்கு அடிமையாகிவிடும் ஒருவரும் கூட அணுவணுவாக தனது உயிரை இவ்வாறே மாய்த்துக்கொள்கிறார். இதுவும் ஒரு வகையில் தற்கொலை என்று தான் கூறவேண்டும்.
இலங்கையில் புகைத்தல் காரணமாக ஒரு நாளில் மட்டும் 54 பேர் மரணமடைவதாக சுகாதார அமைச்சினால் மேற்கொள்ளப்பட்ட ஆய்வு ஒன்று குறிப்பிடுகின்றது. மேலும் வருடம் ஒன்றிற்கு 20 ஆயிரம் பேர் வரையானோர் உயிரிழப்பதாகவும் அதில் குறிப்பிடப்பட்டுள்ளது. புகைத்தலுக்காக நாள் ஒன்றுக்கு 210 மில்லியன் ரூபா செலவிடப்படுகிறது. அதேவேளை புகைத்தலினால் ஏற்படும் நோய்களுக்கு வைத்தியசாலைகளில் சிகிச்சை பெறுபவர்களுக்காக 12,000 மில்லியன் ரூபா செலவிடப்படுகிறது. இவ்வளவு பெருந்தொகையான பணத்தினை பாழாக்கி மரணத்தை கொள்வனவு செய்ய வேண்டுமா? என்ற கேள்வி சமூகத்தில் எழுகிறது.
நோயற்ற ஆரோக்கியமான சமூகத்தை உருவாக்க புகையிலை மற்றும் அது சார்ந்த பொருட்களில் சிக்கித் தவிக்கும் சமூகத்தை எச்சரித்து துரத்தியடிக்க வேண்டும். அதற்காக ஆரோக்கிய வாழ்வை விரும்பும் ஒவ்வொரு மனிதனும் தமது பங்களிப்பை வழங்க வேண்டியது காலத்தின் கட்டாயமாகும்.
புகையிலை ஒழிக்கப்படவேண்டிய ஒன்று என்பதில் யாருக்கும் மாற்றுக் கருத்து இருக்க முடியாது. அதனால் ஏற்படும் விளைவுகளையும், பாதிப்புகளையும் கருத்தில் கொண்டு பல நாடுகள் புகையிலையையும், அதுசார்ந்த பொருட்களையும் தடை செய்திருக்கின்றன. அத்தோடு பொது இடங்களில் புகை பிடிப்பதையும் தடை செய்திருக்கின்றன.
உலகம் முழுவதிலும் உள்ள பல நாடுகளில் பொது இடங்களில் புகை பிடித்தல் தடை செய்யப்பட்டுள்ளமை சட்டமாக நடைமுறைப்படுத்தப்பட்டு வருகின்றது. மீறிப் பொது இடங்களில் புகை பிடிப்போருக்கு தண்டனைகளும் அபராதங்களும் வழங்கப்பட்டு வருகின்றமை குறிப்பிடத்தக்க விடயமாகும்.
அயர்லாந்தில் மூவாயிரம் யூரோ அபராதமும், ஸம்பியாவில் இரண்டு ஆண்டுகள் சிறைத் தண்டனையும், இஸ்ரேலில் 1400 டொலர் அபராதமும் விதிக்கப்படுகின்றன.
மேலும் இந்தியாவில் 5 வருடங்களுக்கு முன்னர் பொது இடங்களில் புகை பிடிக்கத் தடை விதிக்கப்பட்டுள்ளது. 2010 ஆம் ஆண்டு முதல் இலங்கையிலும் இத்தடைச் சட்டம் அமுலில் இருந்து வருகின்றது. மேலும் சட்டத்தை மீறுவோருக்கு தண்டனைகளும் அபராதங்களும் விதிக்கப்பட்டும் வருகின்றன. எனினும் இம் முறைமை எவ்வளவு தூரம் மக்களால் கடைப்பிடிக்கப்படுகின்றது என்பதும் , மீறுவோருக்கான தகுந்த தண்டனைகளும் அபராதங்களும் விதிக்கப்படுகின்றன என்பதும் கேள்வியே!
ஆண்டு தோறும் மே 31 அன்று சர்வதேச புகையிலை எதிர்ப்பு தினம் கடைப்பிடிக்கப்பட்டு வருகின்றது.
புகையிலைப் பொருட்களில் அடங்கியுள்ள நச்சுப்பொருட்கள் நிக்கோட்டின், எத்தனோல், நெப்திலோமின் ஹைட்ரஜன் சயனைட், பைரி, கார்பன் மோனாக்ஸைடு, அமோனியா, கேட்மியம், பெரோனியம், வினைல் குளொரைட் தார், கரியமில வாயு உள்ளிட்ட பல இரசாயனப்பொருட்கள் சிகரெட்டில் அடங்கியுள்ளன. இவை அனைத்தும் மனிதனின் உடல் ஆரோக்கியத்தை அசைத்துப் பார்க்கக் கூடிய ஏன் அவன் உயிரையே பறிக்கக் கூடிய நச்சுப்பொருட்களாகும்.
பல அதிர்ச்சிகரமான
புள்ளிவிபரங்கள்:
நானூறு ஆண்டுகளுக்கு முன் போர்த்துக்கீஸரால் இந்தியாவில் அறிமுகப்படுத்தப்பட்ட புகையிலையின் கோரப்பிடியில் 11 கோடி இந்தியர்கள் சிக்கித் தவிக்கின்றார்கள்.
ஆண்டு தோறும் புகைத்தலினால் சாம்பராகுவோரின் எண்ணிக்கை 10 ஆயிரம் கோடியைத் தாண்டி விட்டது.
சிகரெட் மனிதனைச் சாம்பராக்குகிற கொள்ளிக்கட்டை என்பது தெளிவாகத் தெரிந்திருந்தும் தங்களின் வாழ்வையும், பணத்தையும், உடல் ஆரேக்கியத்தையும் இழந்து வருகிறார்கள் சிகரெட் பிரியர்கள். .
உலக சுகாதார அமைப்பு உலகில் உள்ள ஆண்களில் மூன்றில் ஒரு பங்கினருக்கு புகைபிடிக்கும் பழக்கம் இருக்கிறது என்றும் , இருபதாம் நூற்றாண்டில் இந்த புகையிலை பத்து கோடி பேரின் உயிரைப் பறித்திருக்கிறது என்றும் இருபத்தோராம் நூற்றாண்டில் நூறு கோடி பேரின் உயிரை பறிக்க இருக்கிறது என்ற தகவலையும் தந்து நம் எல்லோரையும் அதிர்ச்சிக்குள்ளாக்குகிறது.
ஆண்டு தோறும் 90 சதவீதத்திற்கும் அதிகமானோர் மாரடைப்பினால் இறக்கின்றனர். அவர்களில் அதிகமானோர் புகை பிடிப்பதனால் இறக்கின்றனர் என்கிறது இன்னொரு அதிர்ச்சித் தகவல்.
புகைத்தலினால் 8 விநாடிக்கு ஒருவர் இறக்கிறார்.
உலகில் 10 இல் ஒருவரது வாழ்க்கை முடிய புகையிலையே காரணம்.
உலக அளவில் புகையிலையின் விற்பனை ஒரு நிமிடத்திற்கு ஒரு கோடிக்கும் அதிகம். தினசரி விற்பனை 1500 கோடியாகும்.
புகையிலைப் பொருட்களினால்
ஏற்படும் அபாயகரமான
விளைவுகளும் பாதிப்புக்களும்
புகைப்பிடிப்பவர்களுக்கு ஏற்படும் நோய்களில் மிக முக்கியமானவை மாரடைப்பு, காசநோய், ஆஸ்துமா, புற்றுநோய், முடி உதிர்தல், கண் பார்வைக் கோளாறு, தோலில் சுருக்கம் விழுந்து முதிய தோற்றம் ஏற்படுதல், தோல் புற்று நோய், காது கேளாமை, பல் சொத்தை, நெஞ்சில் சளி, எலும்பு முறிவு நோய், இதயக் கோளாறு, வயிற்றுப்புண், விரல்களில் நிறம் மாறுதல், சோரியாஸிஸ் என்னும் தோல் நோய், ஆணாக இருப்பின் விந்தணுக்கள் குறைந்து குழந்தைப் பேற்றின்மை, பெண்ணாக இருப்பின் மலட்டுத் தன்மை கர்ப்பப்பை புற்று நோய், போன்ற பல ஆபத்தான நோய்கள் ஏற்படுவதாக ஆய்வுகள் தெரிவிக்கின்றன.
வீண்- விரயம்:
28 ரூபா பணத்தைக்கொண்டு எந்த விதத்திலும் நன்மையளிக்காத, தீமையைத் தரக் கூடிய சிகரெட்டொன்றை வாங்கி ஊதித் தள்ளுவதென்பது வீண் விரயச் செலவாகும்.
ஒரு சிகரெட்டின் விலை 28 ரூபாவாயின் ஒருவன் சராசரியாகக் குறைந்தது ஒரு நாளைக்கு 5 சிகரெட் புகைப்பதாக இருந்தால்..
ஒரு நாளைக்கு - 140 ரூபா
ஒரு வாரத்துக்கு - 980 ரூபா
ஒரு மாதத்திற்கு - 4,200 ரூபா
ஒரு வருடத்திற்கு - 50,400 ரூபா
பத்து வருடங்களுக்கு - 504,000 ரூபா
இவ்வாறான வீண் விரயங்களைத் தவிர்ப்பதனால் குடும்பஸ்தர் ஒருவர் தனது பிள்ளைகளுக்கு நல்லதொரு கல்வியை வழங்கி அதனூடாக அவர்களுக்கு சிறந்த எதிர்காலத்தை வழங்கமுடியுமல்லவா?
சிகரெட் புகைப்பவர் விடும் புகையினால் அவர் பாதிப்படைவதுடன் அவரைச் சூழவுள்ளவர்களும் பாதிப்பிற்குள்ளாகின்றனர். இதனால் சம்பந்தப்பட்டவர் பாதிக்கப்படுவதை விட அவர் விடும் புகையை சுவாசிப்பவர் அதிகம் பாதிக்கப்படுகிறார் என்று மருத்துவர்கள் தெரிவிக்கின்றனர்.
நவீன மனிதன் ஆரோக்கியத்தில் அலட்சியம் காட்டுகிறான். அவனுக்கு எவ்வளவோ அருட்கொடைகள் வழங்கப்பட்டிருக்கின்றன. அவற்றில் ஒன்று உடல் நலம். உடல் நலத்தில் மனிதர்களில் பெரும்பாலானோர் அலட்சியமாகவே இருக்கின்றனர். உடல் நலத்தைப் பேணாமல் நோய்த்தாக்கத்திற்கு உள்ளானதன் பின்னர் அவற்றிலிருந்து குணம் பெற பற்பல மருத்துவ சிகிச்சைகளையும் அதற்கான .முயற்சிகளையும் நாடி மருத்துவர்களிடம் விரைகின்றனர்.
புகை பிடிக்க வேண்டும் என்று தோன்றும் போது கோதுமையை வாயில் போட்டு மெல்லலாம், அல்லது சூரிய காந்தி விதைகளை மெல்லலாம், அல்லது சூயிங்கம் போன்ற மாற்று ஏற்பாடுகளை கையாளும் போது புகையிலையை விட்டும் முற்றிலுமாக நம்மால் ஒதுங்க முடியும்.
புகையிலையும், அது சார்ந்த பொருட்களும் மனித சமூகத்திற்கு எவ்விதத்திலும் பயன்களைத் தருகின்ற பொருட்களல்ல. மாறாக மனித சமூகத்தை அழிக்கவல்லவை என்பதும் மேற்கூறப்பட்ட தகவல்களிலிருந்து தெளிவாகத் தெரிந்து கொள்ள முடிகின்றது.
எனவே எமது அரசாங்கம் தீவிர முயற்சிகளை மேற்கொண்டு புகையிலையையும், அதுசார்ந்த பொருட்களையும் முற்றிலுமாகத் தடை செய்யவேண்டும்.
இவ்வாறு கடுமையான பாதிப்புக்களை உடல் ரீதியாகவும் உளவியல் ரீதியாகவும் உங்களுக்கு ஏற்படுத்தும் இந்த புகைத்தல் பழக்கம் உங்களுக்கு தேவை தானா என்பதை நீங்கள் தான் முடிவு செய்துகொள்ள வேண்டும்.
நீங்கள் புகைப்பிடிக்கும் பழக்கம் உள்ள ஒருவராயின், நான் புகைத்தலுக்கு அடிமையாகி விட்டேனே என்றோ, என்னால் இத்தீய பழக்கத்தை கைவிட முடியுமா அல்லது முடியவில்லை என்றோ வீணாக மனதை போட்டுக் குழப்பிக் கொள்ளாதீர்கள்.
மாற்றம் குறித்த சிந்தனையையும், அச்சிந்தனையின் வழியாக உலகில் மாற்றத்தையும் கொண்டு வரக் கூடிய ஆற்றல் மனிதர்களிடம் மாத்திரமே இருக்கின்றது.
எனவே, நீங்கள் நினைத்தால் இத்தீய புகைப்பழக்கத்தை கைவிட முடியும். ஒவ்வொரு முறையும் சிகரெட்டுக்கு வைக்கும் நெருப்பு உங்கள் வாழ்க்கைக்கும் சேர்த்தே வைத்துக் கொள்ளப்படுகின்றது என்பதை ஒரு நாளும் மறந்து விடாதீர்கள்.
மன திடகாத்திரத்துடன் ஒரு முடிவுக்கு வாருங்கள். இன்றே, இப்பொழுதே, இந்நொடியிலேயே இந்தப் பத்தியை வாசித்து முடியும் இத்தருணமே என்னால் புகைக்காமல் இருக்க முடியும் என உறுதி கொள்ளுங்கள். நிச்சயம் உங்களால் முடியும்.
எப்.ப(f)ஸ்னா
.jpg)
கருத்துகள் இல்லை:
கருத்துரையிடுக