இத்தகைய தொடர் கொள்ளைச் சம்பவங்களினால் இரவு வேளைகளில் அச்சத்துடன் மக்கள் விழித்திருக்கவேண்டிய சூழ்நிலை கூட உருவாகியுள்ளது. கடந்த 02 ஆம் திகதி புதன்கிழமை இரவு யாழ்ப்பாணத்தில் வரலாற்றுப் புகழ் மிக்க பொன்னாலை வரதராஜப்பெருமாள் ஆலயத்தில் 170 பவுண் தங்க நகைகள் கொள்ளையிடப்பட்டுள்ளன. ஆலயத்தின் கூரை ஓட்டினை அகற்றி உள்நுழைந்து மூல விக்கிரகம் இருக்கின்ற மண்டபத்திற்கு அடுத்த மண்டபத்தில் இரும்புப் பெட்டகம் ஒன்றினுள் வைக்கப்பட்டிருந்த சகல நகைகளையும் கொள்ளையர்கள் கொள்ளையடித்துள்ளனர்.
இக்கொள்ளைச் சம்பவத்தில் ஈடுபட்டவர்கள் ஆலயத்திற்குள் கொத்துரொட்டி பார்சல் ஒன்றை தவறுதலாக விட்டுச் சென்றுள்ளனர். அதேபோல், இவர்கள் சில பீடிக்குறைகளையும் ஆலயத்திற்குள் விட்டுச் சென்றுள்ளனர்.
குறித்த இரவு ஆலயத்திற்கு அருகிலுள்ள கடையில் மூவர் கொத்துரொட்டி சாப்பிட்டதாகவும், ஒருவர் அதனை பார்சலாக வாங்கிச் சென்றதாகவும், குறித்த கடைக்காரர் தகவல் தெரிவித்திருக்கிறார். இந்த நபர்களே கொள்ளைச் சம்பவத்தில் ஈடுபட்டிருக்கவேண்டுமென்று சந்தேகிக்கப்படுகின்றது.
இதேபோல், கடந்த சனிக்கிழமை யாழ். மாவட்டத்தில் மூன்று இடங்களில் இடம்பெற்ற கொள்ளைச் சம்பவங்களில் பல இலட்சம் ரூபா பணம் மற்றும் நகைகள் கொள்ளையிடப்பட்டுள்ளன.
வடமராட்சியின் மருதங்கேணி தெற்குப் பிரதேசத்தில் நள்ளிரவு வீடு மற்றும் வியாபார நிலையங்களுக்கு சென்ற கொள்ளையர் கொள்ளை நடவடிக்கைகளில் ஈடுபட்டுள்ளனர். அப்பகுதியிலுள்ள இருதயநாதன் என்பவருடைய வீட்டுக்குள் புகுந்த கொள்ளையர்கள் ஒன்றரை இலட்சம் ரூபா பெறுமதியான நகை மற்றும் பொருட்களை கொள்ளையடித்துள்ளனர்.
சிவபாதசுந்தரம் என்பவருடைய வீட்டுக்குள் புகுந்த கொள்ளையர்கள் 25 ஆயிரம் ரூபா பெறுமதியான பொருட்களையும், சிவகுமார் அருந்ததி என்பவருடைய வீட்டுக்குள் புகுந்த கொள்ளையர்கள் 10 ஆயிரம் ரூபா பெறுமதியான துவிச்சக்கரவண்டியையும் கொள்ளையடித்துள்ளனர். இச்சம்பவம் குறித்து பருத்தித்துறை பொலிஸ் நிலையத்தில் முறைப்பாடு செய்யப்பட்டுள்ளது.
இதேவேளை, யாழ்ப்பாணம் மருதநார் மடம் பகுதியில் வியாபார நிலையமொன்றினை உடைத்த கொள்ளையர்கள் ஒன்றரை இலட்சம் ரூபா பெறுமதியான பொருட்களையும் தொலைபேசிக்கான மீள்நிரப்பு அட்டைகளையும் கொள்ளையிட்டுள்ளனர்.
இந்தச் சம்பவம் குறித்து சுன்னாகம் பொலிஸ் நிலையத்தில் முறையிடப்பட்டுள்ளது. இதேபோல், யாழ்ப்பாணம் பழைய பூங்கா வீதியிலுள்ள பலசரக்கு வியாபார நிலையமொன்றும் உடைக்கப்பட்டு பொருட்கள் கொள்ளையிடப்பட்டுள்ளன. இவ்வாறு நாள்தோறும் குடாநாட்டிலும் வன்னிப்பகுதியிலும் கொள்ளைச்சம்பவங்கள் அதிகரித்து வருகின்றன.
யுத்தம் முடிவடைந்து நான்கு வருடங்கள் கடந்து விட்டன. வடக்கில் யுத்தத்தில் இடம் பெயர்ந்த மக்கள் மீளக்குடியேற்றப்பட்டுள்ளபோதிலும் அவர்களுக்கான அடிப்படை வசதிகள் இன்னமும் பூரணப்படுத்தப்படவில்லை. தமது வாழ்வாதாரத்தை கொண்டு நடத்துவதற்கான முழுமையான வேலைவாய்ப்புக்களோ அல்லது வருமானமோ இன்றி மக்கள் அல்லல்பட்டே வருகின்றனர்.
இத்தகைய கொள்ளைச் சம்பவங்கள் தொடர்வதற்கான காரணங்கள் குறித்தும் அதனை தடுப்பதற்கான வழிவகைகள் தொடர்பாகவும், ஆராயவேண்டியது தற்போதைய நிலையில் அவசரமான தேவையாக உள்ளது. மக்கள் மத்தியில் வருமானம் இன்றி கஷ்டங்கள் அதிகரிக்கும் சூழ்நிலையிலும் இவ்வாறான கொள்ளைச் சம்பவங்கள் அதிகரிக்கும் வாய்ப்பு ஏற்படுகின்றது. இத்தகைய வாய்ப்பைப் பயன்படுத்தி பல்வேறு சக்திகளும் மக்களை அச்சப்படுத்தும் வகையிலும் கொள்ளைச் சம்பவங்களில் ஈடுபடுவதற்கான சந்தர்ப்பங்களும் உள்ளதை மறுக்க முடியாது.
எனவே, வன்னியிலும் குடாநாட்டிலும், மூலைக்கு மூலை படையினரும் பொலிஸாரும் கடமையில் ஈடுபடுத்தப்பட்டுள்ளனர். இவ்வாறான ஒரு சூழலில் அங்கு கொள்ளைச் சம்பவங்கள் நாள்தோறும் அதிகரித்து வருகின்றமையானது பல்வேறு சந்தேகங்களை மக்கள் மத்தியில் ஏற்படுத்தி வருவதுடன் அச்ச உணர்வையும் ஏற்படுத்துகின்றது.
தொடரும் கொள்ளை மற்றும் திருட்டுச் சம்பவங்களை தடுத்து நிறுத்தும் வகையில் பொலிஸாரும் படையினரும் செயற்படவேண்டும். கிராமங்கள் தோறும் விழிப்புக்குழுக்களை அமைத்து அதற்கு பூரண ஒத்துழைப்பினை வழங்கி இத்தகைய கொள்ளைச்சம்பவங்களை தடுத்து நிறுத்த பொலிஸார் முயற்சிக்க வேண்டும்.
வடபகுதியில் யுத்தத்தினால் இடம் பெயர்ந்து மீளக்குடியேற்றப்பட்டுள்ள மக்களின் வாழ்வாதாரத்தை கட்டியெழுப்புவதற்கான செயற்றிட்டங்கள் தொடர்ந்தும் முன்னெடுக்கப்படுவதுடன் அப்பகுதியில் வேலையில்லாது பெரும் கஷ்டங்களை அனுபவிக்கும் மக்களுக்கு வேலைவாய்ப்புக்கள் மற்றும் வருமானத்தை ஈட்டக்கூடிய வழிவகைகளை அரசாங்கம் தொடர்ந்தும் முன்னெடுப்பதற்கு முன்வரவேண்டும்.
வடமாகாண சபைத்தேர்தலில் தமிழ் தேசியக்கூட்டமைப்பு அமோக வெற்றி பெற்றுள்ளது. இந்த மாகாணசபையின் முதலமைச்சராக முன்னாள் நீதியரசர் சி,வி. விக்கினேஸ்வரன் ஜனாதிபதி முன்னிலையில் பதவிப்பிரமாணம் செய்திருக்கிறார். அமைச்சரவையும் உறுப்பினர்களும் எதிர்வரும் 11 ஆம் திகதி யாழ்ப்பாணத்தில் பதவியேற்கவுள்ளனர். இந்த நிலையில் மாகாணசபையின் நிர்வாகத்தை ஒழுங்கான முறையில் செயற்படுத்துவதற்கு மத்திய அரசாங்கம் ஒத்துழைப்பு வழங்கவேண்டும்.
இதன் மூலம் வடபகுதி மக்களுக்கு ஏதோ ஓரளவாவது சேவைகள் கிடைப்பதற்கு வழிவகைகள் செய்யப்படவேண்டும். வடமாகாணசபையின் செயற்பாட்டிற்கு அரசாங்கம் பூரண ஒத்துழைப்பு அளிப்பதுடன் மத்திய அரசாங்கத்தின் மூலமும் எதிர்காலத்தில் வடக்கு மக்களுக்கான பூரண சேவையினை அரசாங்கம் ஆற்ற வேண்டும். ஏனெனில் வடக்கு மாகாணம் யுத்தத்தால் பெரும் பாதிப்புக்களை சந்தித்த பகுதியாகும். உறவுகளையும் உடைமைகளையும் இழந்து அந்த மக்கள் தொடர்ந்தும் பரிதவித்து வருகின்றனர்.
அந்த மக்களின் வாழ்வாதாரத்தை கட்டியெழுப்பும் வகையில் செயற்பாடுகள் மேற்கொள்ளப்பட்டால் கொள்ளைச் சம்பவங்களும் ஓரளவிற்கு குறையும். அதேபோல், வேறு சக்திகளினால் மேற்கொள்ளப்படும் கொள்ளைச் சம்பவங்களை கடும் நடவடிக்கைகள் மூலம் கட்டுப்படுத்துவதற்கு பொலிஸார் முன்வரவேண்டும். இத்தகைய வழிகளை கையாண்டால் மட்டுமே வடக்கில் சுமுகமான நிலையினை ஏற்படுத்த முடியும்.
இல்லையேல் தொடர்ந்தும் வடபகுதி மக்கள் அச்சத்துடனேயே தமது பொழுதை கழிக்கும் நிலை ஏற்படும். எனவே, இது குறித்து சிந்தித்து உரிய நடவடிக்கைகளை எடுக்கவேண்டியது இன்றியமையாததாகும்.
.jpg)
கருத்துகள் இல்லை:
கருத்துரையிடுக