இச்சந்தர்ப்பத்தில் பெண்கள் தாங்கள் சுமக்கும் சிசுவுடன் சேர்த்து கர்ப்பப்பையில் கட்டிகளும் உள்ளன என அறிந்தவுடன் தமது சிசுவுக்கோ தமக்கோ ஆபத்துக்கள் வரக்கூடும் என ஏங்குவார்கள். இவ்வாறான சந்தர்ப்பங்களில் இவர்களது சந்தேகங்கள் தீர்க்கப்படக்கூடியவாறு விளக்கங்கள் கிடைக்குமா? என்பது கேள்விக்குறியாகத்தான் உள்ளன. ஏனெனில் இப்படி பிரச்சினைகள் உள்ளவர்கள் பலர் பயப்படக்கூடியவாறு கதைகளை கேட்டு மிகவும் பயந்து போன நிலையில் இருப்பதைக் காணக்கூடியதாக உள்ளது.
எனவே, தான் கர்ப்பப் பை கட்டிகள் கர்ப்ப காலத்தில் கண்டறியப்பட்டால் அடுத்து என்ன செய்ய வேண்டும் என பெண்களுக்கும் குடும்பத்தினருக்கும் அறியத் தருவது அவசியமாக உள்ளது.
கர்ப்பப்பை கட்டிகள் கர்ப்ப காலத்தில் புதிதாகத் தோன்றுமா?
கர்ப்பப்பையில் பைப்புரோபிட் கட்டிகள் புதிதாக உருவாகமாட்டாது. ஆனால் ஏற்கனவே அதாவது கர்ப்பம் தரிக்க முன்னரே இருந்த பைப்புரோயிட் கட்டிகள் மெதுமெதுவாக வளரக்கூடும். கர்ப்பப்பையில் ஹோர்மோன்களின் பங்களிப்பால் கர்ப்பப்பை கட்டிகள் பருமனில் அதிகரிக்கின்றது. இதனால் தான் ஏற்கனவே இருந்த கட்டிகள் பெரிதாக மாறுகின்றது.
பைப்புரோயிட் கட்டிகளால் கர்ப்ப காலத்தில் ஏற்படக்கூடிய ஆபத்துக்கள் எவை?
கர்ப்பபையில் பல கட்டிகள் உள்ள போதும் பெரிய கட்டிகள் உள்ள போது சிலவேளைகளில் கருவானது இயற்கையாக கலையக்கூடிய சந்தர்ப்பங்கள் உள்ளன. இது இயற்கையான கரு கலைதல் நிகழ்வு எனக் கூறப்படும். அது மட்டுமல்ல கர்ப்பத்தில் சிசுவுடன் கர்ப்பப்பை கட்டிகளும் உள்ள போது வயிற்று வலி இடையிடையே வந்து அவதிப்படும் நிலை ஏற்படுகின்றது. இதற்கு வயிற்று வலியைக்கட்டுப்படுத்தக் கூடியவாறான மாத்திரைகளையோ ஊசிகளையோ வழங்குவதன் மூலம் சிகிச்சையளிக்கப்படும்.
மேலும், கர்ப்பப்பையில் கட்டிகள் உள்ள போது கர்ப்பிணி பெண்ணின் வயிறு சாதாரண அளவை விட பெரிதாக தோற்றமளிக்கும். இதனால் 6 மாத கர்ப்ப காலத்துக்கும் வயிறு 8, - 9 மாதங்கள் போல் தோற்றமளிக்கும். இதன்போது பெண் அசெளகரியங்களை அனுபவிப்பாள்.
அது மட்டுமல்ல, கர்ப்பப்பை கட்டிகள் உள்ள போது கர்ப்பத்தில் உள்ள சிசுவின் நிலையும் மாறக்கூடும். அதாவது சிசுவானது குறுக்காகவோ அல்லது தலைமேல் கால் கீழாகவோ இருக்கக் கூடும்.
கர்ப்பப்பை கட்டிகள் உள்ள போது பிரசவமானது எவ்வாறு இருக்கும்?
கர்ப்ப பையில் கட்டிகள் அதாவது பைப்புரோயிட் கட்டிகள் இருக்கும் போது பிரசவமானது சிசேரியனாகவோ அல்லது சாதாரண சுகப் பிரசவமாகவோ இருக்கும் என்பது பலர் மனதிலும் ஒரு கேள்வியாகத்தான் இருக்கும்.
பைப்புரோயிட் கட்டிகள் கர்ப்பபையில் இருக்கும் இடத்தைப் பொறுத்து பிரசவ முறையை முடிவு செய்யலாம் என்றே தெரிவிக்க வேண்டும். அதாவது கர்ப்பப்பையின் மேல் புறத்தில் பைப்புரோயிட் கட்டிகள் இருந்தால் சாதாரண சுகப் பிரசவத்துக்கு வாய்ப்புள்ளது. அதுபோல் பைப்புரோயிட் கட்டிகள் கர்ப்பப்பையின் கீழ் புறத்தில் இருந்தால் சாதாரண சுகப் பிரசவம் கடினம். சிசேரியன் பிரசவம்தான் முடியும்.
எனவே, பைப்புரோயிட் கட்டிகள் கர்ப்பபையில் இருக்கும் விதத்தை பொறுத்தே சிசேரியனா? அல்லது சாதாரண சுகப் பிரசவமா? எனத் தீர்மானிக்கலாம்.
கர்ப்பகாலத்தில் பைப்புரோயிட் கட்டிகள் உள்ள போது சத்திர சிகிச்சை செய்து கட்டிகளை அகற்ற முடியுமா?
பைப்புரோயிட் கட்டிகளை கர்ப்ப காலத்தில் சத்திர சிகிச்சை செய்து அகற்ற முடியாது. அத்துடன் பிரசவ நேரத்திலோ சிசேரியன் பிரசவத்திலோ கூட பைப்புரோயிட் கட்டிகளை சத்திர சிகிச்சை மூலம் அகற்ற முடியாது. இது ஆபத்தானது. எனவே கர்ப்ப கால பிரசவம் முடிந்த பின்னர் தான் இது குறித்து தீர்மானிக்க வேண்டும்.
டாக்டர் கு.சுஜாகரன் மகப்பேற்று பெண் நோயியல் சத்திரசிகிச்சை நிபுணர்
.jpg)
கருத்துகள் இல்லை:
கருத்துரையிடுக