பிரான்ஸ் மொழியில் பாடல் பாடிய சிறுவர் படையணி உறுப்பினர்கள்
ஐ.எஸ். தீவிரவாதிகள் தமது தீவிரவாத குழுவின் சிறுவர் படையணியைச் சேர்ந்த உறுப்பினர்கள் பிரான்ஸ் மொழியில் பாடல் பாடுவதை உள்ளடக்கிய எதிர்கால தீவிரவாத தாக்குதல் தொடர்பான புதிய காணொளிக் காட்சியொன்றை வெளியிட்டுள்ளனர்.
“எமது போராட்ட வீரர்கள் எங்கும் உள்ளனர். அவர்கள் உயிர்த் தியாகம் செய்வதற்கு தயாராக உள்ளனர்" என அந்தப் பிரான்ஸ் மொழியிலான பாடல் வரியொன்று கூறுகிறது. மேற்படி காணொளிக் காட்சியில் தோன்றும் சிறுவர்களில் பலர் மேற்குலக நாடுகளைச் சேர்ந்தவர்கள் போன்று தோன்றுகின்றனர்.
அவர்கள் அனைவரும் 12 வயதுக்கு கீழ்ப்பட்ட வயதையுடையவர்கள் என நம்பப்படுகிறது.
அதேசமயம் ஐ.எஸ். தீவிரவாதிகளின் அல் ஹாயத் சமூக ஊடகத்தில் வெளியிடப்பட்ட இந்தக் காணொளிக் காட்சியில் பிரான்ஸ் மொழிப் பாடலின் ஆங்கில மொழிபெயர்ப்பு காட்சிப்படுத்தப்பட்டிருந்தமை குறிப்பிடத்தக்கது.
“உங்களது பெறுமதி மிக்கவையாக கூறப்படும் சுதந்திரங்கள் என்ற பெயரால் எம்மை படுகொலை செய்வதற்கான உரிமையை உங்களுக்கு நீங்களே வழங்கியுள்ளீர்கள். உங்களது இந்த வெறுக்கத்தக்க குற்றச்செயலுக்காக உங்கள் குருதி ஆறாக பாயப் போகிறது" என அந்தக் காணொளிக் காட்சியில் எச்சரிக்கை விடுக்கப்பட்டுள்ளது.
பிரான்ஸ் மொழி பேசும் சிறுவர்களைப் பயன்படுத்தி ஐ.எஸ். தீவிரவாதிகள் காணொளிக் காட்சியொன்றை வெளியிடுவது இதுவே முதல் தடவையாகும்.
இதற்கு முன் மேற்கு ஆபிரிக்காவின் ஐ.எஸ். தீவிரவாதிகள் என அழைக்கப்படும் போகோ ஹராம் தீவிரவாதிகள் சிறுவர்கள் பாடல் பாடுவதை வெளிப்படுத்தும் காணொளிக் காட்சியொன்றை வெளியிட்டிருந்தமை குறிப்பிடத்தக்கது.
கருத்துகள் இல்லை:
கருத்துரையிடுக