பிரான்ஸின் நீஸ் நகரிலுள்ள கடற்கரையில் உடலை முழுமையாக மறைக்கும் வகையில் நீச்சலுடைக்கு மேலாக மேலாடை அணிந்து சூரிய குளியலில் ஈடுபட்ட பெண்ணொருவர் ஆயுதந்தாங்கிய பொலிஸாரால் தனது மேலாடையைக் களைய நிர்ப்பந்திக்கப்பட்ட சம்பவம் செவ்வாய்க்கிழமை இடம்பெற்றுள்ளது.
அண்மையில் சுதந்திர தினக் கொண்டாட்டங்களின் போது டிரக் வண்டியொன்றைப் பயன்படுத்தி தாக்குதல் நடத்தப்பட்ட பிரதேசத்திலிருந்து சில யார்கள் தொலைவில் புரொமெனட் டெஸ் அங்லெயிஸ் கடற்கரையில் குறிப்பிட்ட பெண் அமைதியாக சூரிய குளியலில் ஈடுபட்டிருந்த வேளை அவரை மிளகு தூள் பிரயோக உபகரணம் மற்றும் குண்டாந்தடிகளுடன் நெருங்கிய 4 பொலிஸ் உத்தியோகத்தர்கள் அவரை நோக்கி மிளகு தூள் பிரயோக உபகரணத்தைப் பிடித்தவாறு உடலை முழுமையாக மறைக்கும் வகை யில் அணிந்திருந்த மேலாடையைக் களைய அவரை நிர்ப்பந்தித்துள்ளனர்.
அதேசமயம் அங்கு தலையை மறைக்கும் ஆடை அணிந்து நடமாடிய 34 வயது பெண்ணொருவருக்கு தண்டப் பணத்தை செலுத்த பொலிஸார் உத்தரவிட்டுள்ளனர்.
மேற்படி சம்பவத்துக்கு சில நாட்களுக்கு முன்னர் கேன்ஸ் கடற்கரையில் உடலை முழுமையாக மறைக்கும் நீச்சலுடை அணிந்திருந்த நான்கு பெண்களுக்கு 38 யூரோ தண்டப் பணம் விதிக்கப்பட்டமை குறிப்பிடத்தக்கது.
கருத்துகள் இல்லை:
கருத்துரையிடுக